កាលពីថ្ងៃទី១៧ ខែធ្នូ ឆ្នាំ២០១៥ រដ្ឋាភិបាលចិនបានកោះហៅឯកអគ្គរដ្ឋទូតអាមេរិកប្រចាំនៅប៉េកាំងដើម្បីប្រឆាំងតវ៉ា ចំពោះការប្រកាសរបស់ទីក្រុងវ៉ាស៊ីនតោនដែលអាចនឹងលក់នាវាចម្បាំង២គ្រឿងឲ្យទៅតៃវ៉ាន់ក្នុងតម្លៃប្រមាណ១.៨ពាន់លានដុល្លារនោះ ។
ប៉ុន្តែទោះបីយ៉ាងណា កិច្ចព្រមព្រៀងទិញ លក់នាវាចម្បាំងរបស់តៃវ៉ាន់ ជាមួយអាមេរិកខាងលើនេះបានកើតឡើង ស្របពេលដែលមានការសម្រុះសម្រួលរវាងចិន នឹងតៃវ៉ាន់ដែលបានប្រេះឆាគ្នាតាំងពីសម័យសង្គ្រាមឆ្នាំ១៩៤៩រៀងរហូត ហើយបើទោះជាបែបនេះក៏ដូច ទីក្រុងវ៉ាស៊ីនតោននៅតែមានការបារម្ភដោយសារសកម្មភាពយោធារបស់ទីក្រុងប៉េកាំងនៅសមុទ្រចិនភាគខាងត្បូងនោះ ។
នៅលើគេហទំព័ររបស់ក្រសួងការបរទេសចិនមានចេញសេចក្តីថ្លែងការណ៍មួយដោយបញ្ជាក់ថា ឧបការីរដ្ឋមន្ត្រីការបរទេសចិន លោក Zheng Zeguang បានធ្វើបទបង្ហាញជាឧឡារិកជាមួយលោក Kaye Lee ទទួលបន្ទុកកិច្ចការការពារជាតិរបស់អាមេរិក កាលពីថ្ងៃទី១៦ ខែធ្នូ ឆ្នាំ២០១៥ ជុំវិញការលក់នាវាផ្ទុកយន្តហោះចម្បាំងរបស់អាមេរិកទៅឲ្យប្រទេសតៃវ៉ាន់ ។
ក្រសួងការបរទេសអាមេរិក កាលពីថ្ងៃទី១៦ ខែធ្នូ បានអះអាងថា អាមេរិកមានបំណងលក់ទៅឲ្យរដ្ឋាភិបាលទីក្រុងតៃប៉ិ នូវសព្វាវុធដូចនាវាចម្បាំង២គ្រឿងប្រភេទ Perry-class Frigates, មីស៊ីលប្រឆាំងរថពាស់ដែកប្រភេទ Javelin, មីស៊ីលប្រឆាំងរថក្រោះប្រភេទ TOW 2B, រថពាសដែកដែលអាចបើកបរនៅលើផ្ទៃទឹកបាន ប្រភេទ AAV-7 Amphibious Assault Vehicles ព្រមទាំងប្រព័ន្ធកាំជ្រួចមីស៊ីលជាច្រើនទៀង ។
ក្រសួងការបរទេសចិនបានប្រកាសថា ប្រទេសចិនប្រឆាំងយ៉ាងដាច់អហង្ការចំពោះការលក់សព្វាវុធរបស់អាមេរិកឲ្យទៅតៃវ៉ាន់នាពេលនេះ និងថា ខ្លួនអាចនឹងដាក់ទណ្ឌកម្មប្រឆាំងក្រុមហ៊ុនទាំងឡាយណាដែលទាក់ទងជាមួយការលក់អាវុធទាំងនេះ ។
ក្រសួងការបរទេសចិនបញ្ជាក់ទៀតថា រដ្ឋាភិបាលចិនសូមជំរុញឲ្យរដ្ឋាភិបាលអាមេរិកលុបចោលកិច្ចព្រមព្រៀងលក់អាវុធទៅឲ្យតៃវ៉ាន់ និងបញ្ឈប់រាល់កិច្ចព្រមព្រៀងយោធារវាងតៃវ៉ាន់ នឹងអាមេរិក ដើម្បីចៀសវាងការធ្វើឲ្យបែកបាក់បន្ថែមទៀតទៅលើសេនាយីយោទំនាក់ទំនង និងកិច្ចសហប្រតិបត្តិការជាឧបតោភាគីនៅទីតាំងដែលមានសារសំខាន់ ។
នៅក្នុងជំនួបពិភាក្សានោះ លោក Zheng បានព្រមានលោកស្រី Lee ថា ការលក់សព្វាវុធទាំងនោះវាបានរំលោភទៅលើច្បាប់អន្តរជាតិ និងបទដ្ឋានស្តីអំពីទំនាក់ទំនងអន្តរជាតិ ព្រមទាំងរំលោភដែនអធិបតេយ្យ និងសន្តិសុខរបស់ប្រទេសចិនយ៉ាងខ្លាំង ។
ស្ថិតនៅក្រោមការដឹកនាំរបស់លោក Ma Ying-jeou ប្រធានាធិបតីតៃវ៉ាន់នាពេលបច្ចុប្បន្ននេះ ទំនាក់ទំនងរវាងទីក្រុងប៉េកាំង នឹងតៃប៉ិ មានការកក់ក្តៅ ដែលស្ថិតក្រោមគណបក្ស Kuomintang ។ ប៉ុន្តែប្រទេសចិនច្រានចោលមិនលុបចោលសិទ្ធិប្រើប្រាស់កងកម្លាំងទ័ព ប្រសិនបើទីក្រុងតៃប៉ិហ៊ានប្រកាសឯករាជ្យជាផ្លូវការណាមួយនោះ ។
ប្រទេសចិន និងតៃវ៉ាន់ទើបតែចប់សង្គ្រាមស៊ីវិលក្នុងឆ្នាំ១៩៤៩ប៉ុណ្ណោះ ។
សហរដ្ឋអាមេរិកបានទទួលស្គាល់ភាគីចិនជាងតៃវ៉ាន់ ប៉ុន្តែទោះយ៉ាងណា អាមេរិកនៅតែជាមិត្តដ៏សំខាន់មួយ និងបានផ្គត់ផ្គង់អាវុធទៅឲ្យកោះតៃវ៉ានជានិច្ច ហើយក៏ជាមូលហេតុដែលនាំឲ្យមានស្ថានការតាន់តឹងកើតឡើងជាមួយទីក្រុងប៉េកាំងនោះផងដែរ ។
ទីក្រុងវ៉ាស៊ីនតោនបានសម្តែងការខឹងសម្បារចំពោះទីក្រុងប៉េកាំង ហើយកាលពីខែតុលា ឆ្នាំ២០១៥កន្លងមកនេះ នាវាចម្បាំងអាមេរិកមួយគ្រឿងបានធ្វើនាវាចរណ៍ទៅកៀកជិតដែនក្រោះសិប្បនិមិត្តរបស់ចិន និងជាបន្ទាយយោធាដែលចិនបានស្ថាបនាឡើងនៅដែនសមុទ្រចិនភាគខាងត្បូងនោះ ។
ទីក្រុងវ៉ាស៊ីនតោនបញ្ជាក់ថា សកម្មភាពរបស់ខ្លួនគឺធានាដល់សុវត្ថិភាពនៅក្នុងការធ្វើនាវាចរណ៍តាមផ្លូវសមុទ្រ ៕
ប្រែសម្រួល៖ ថាច់ យ៉ាត
