ភ្នំពេញ៖ អត្តពលិក ប្រមាណជិត២០០នាក់ ចម្រុះជាតិសាសន៍មកពី១២ប្រទេសផ្សេងៗគ្នា បានមកចូលរួម ប្រកួតជ្រើសរើសជើងឯកកីឡាប៉េតង់អាស៊ីលើកទី១៩ នៅរាជធានីភ្នំពេញនៃព្រះរាជាណាចក្រកម្ពុជា ដែល មានរយៈពេល៣ថ្ងៃចាប់ពីថ្ងៃទី១៧ ដល់ថ្ងៃទី១៩ ខែធ្នូ ឆ្នាំ២០១៥ ដោយមានការអញ្ជើញជាអធិបតីពីសំណាក់ លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានសហព័ន្ធកីឡា ប៊ូលនិងប៉េតង់កម្ពុជាដើម្បីបោះប៊ីនិងប៊ូលជានិមិត្តរូបបើកការប្រកួតជាផ្លូវការ។
លោកស៊ាន បូរ៉ាត រដ្ឋលេខាធិការក្រសួងអប់រំយុវជននិងកីឡា មានប្រសាសន៍ថា សម្រាប់ការប្រកួត កីឡាប៉េតង់ជ្រើសរើសជើងឯកអាស៊ីលើកទី១៩ធ្វីរាជធានីក្រុងភ្នំពេញ មានអត្តពលិក សរុប១៩០នាក់ មកពី១២ប្រទេស មានដូចជា ប្រទេស ជប៉ុន មានប្រតិភូសរុប១៨នាក់ ប្រទេសចិនតៃវ៉ាន់ ២០នាក់ សិង្ហបុរី ១៤នាក់ វៀតណាម១៥នាក់ ថៃ ២៣នាក់ ប្រ៊ុយណេ ១៥នាក់ ឥណ្ឌូនេស៊ី ១៣នាក់ ឡាវ ១៤នាក់ ម៉ាឡេស៊ី ១៥នាក់ ឥណ្ឌា ៩នាក់ ម៉ុងហ្គោលី ៤នាក់និងកម្ពុជា ៣១នាក់ ។
លោកបានបន្តទៀតថា ចំណែកឯវិញ្ញាសាប្រកួតមានចំនួន៦ ទី១- វិញ្ញាសាវាយយកពិន្ទុ (Shooting) វាយយកពិន្ទុបុរស វាយយកពិន្ទផ្នែកនារី និងវាយយកពិន្ទុផ្នែកយុវជន។ទី២- វិញ្ញាសា៣នាក់ទល់ ៣នាក់ (Triples) បុរស, វាយ៣នាក់ទល់៣នាក់ផ្នែកនារី និងវាយ៣ នាក់ទល់៣នាក់ផ្នែកយុវជន ក្នុងនោះក្រសួងអប់រំយុវជននិងកីឡា ក៏បានទទួលខុសត្រូវលើកការស្នាក់នៅ អំឡុងពេលប្រកួត របស់ប្រតិភូទាំង១២ប្រទេសផងដែរ។
លោកបានបញ្ជាក់ថា ដោយសារតែប្រទេសកម្ពុជា ទទួលរៀបចំធ្វើម្ចាស់ផ្ទះ កីឡាស៊ីហ្គេមលើកទី៣២ ឆ្នាំ២០២៣ ដោយផ្អែកលើគោលនយោបាយជាតិ ស្តីពីការអភិវឌ្ឍវិស័យអប់រំកាយនិងកីឡា ក្រសួងអប់រំយុវ ជននិងកីឡា បានធ្វើវិមជ្ឈការ ការងារទៅឲ្យសហព័ន្ធកីឡាជាតិ ក្នុងការរៀបចំការប្រកួត National cham pionship , Sea Championship និង Asian Championship ដោយខ្លួនឯង។
លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានសហព័ន្ធ កីឡាប៊ូលនិងប៉េតង់កម្ពុជា មានប្រសាសន៍ ស្វាគមន៍ ដល់ប្រតិភូទាំង១២ប្រទេស ប្រកបដោយភាពកក់ក្តៅ យ៉ាងដូច្នេះថា នេះជាលើកទី២ហើយដែលព្រះរាជាណាចក្រកម្ពុជា ទទួលបានសិទ្ធិរៀបចំការប្រកួត កីឡាប៉េតង់ជ្រើសរើសជើងឯកអាស៊ី គឺនៅក្នុងឆ្នាំ២០០១និងឆ្នាំ២០១៥នេះប្រកបដោយមោទភាពបំផុត។
លោកបានបន្តទៀតថា លេងកីឡាមិនត្រឹមតែនាំមកនូវភាពសប្បាយរីករាយប៉ុណ្ណោះទេ ប៉ុន្តែកីឡា បាននាំមកនូវកិត្យានុភាព របស់ប្រទេសជាតិនីមួយៗតាមរយៈជ័យជម្នះរបស់កីឡាករកីឡាការិនី មកពី បណ្តាប្រទេសរបស់ពួកគេរៀងៗខ្លួន ។ លើសពីនេះទៅទៀត លេងកីឡាត្រូវតែសម្តែងភាពស្និទ្ធស្នាល ប្រកប ដោយទឹកចិត្តរួសរាយរាក់ទាក់ ដាក់គ្នាទៅវិញទៅមក បើទោះបីការប្រកួតនេះ ក្នុងក្របខ័ណ្ឌមួយ យកចាញ់ឈ្នះគ្នាក៏ដោយ ៕
ដោយ៖ សារីម
