ប៉ោយប៉ែត៖ កាលពីវេលាម៉ោង៣ទៀបភ្លឺ ថ្ងៃទី១៧ ខែធ្នូ ឆ្នាំ២០១៥ នៅត្រង់ចំណុចស្ថានីយរថភ្លើងចាស់ ស្ថិត ក្នុងភូមិប៉ោយប៉ែត សង្កាត់និងក្រុង ប៉ោយប៉ែត ខេត្តបន្ទាយមានជ័យ នាងក្រមុំម្នាក់ ខណៈចេញពីធ្វើការនោះ ត្រូវក្រុមស្ទាវញៀនថ្នាំប្រុស ស្រី៦នាក់ស្ទាក់ផ្លូវចាប់ដោះយកគ្រឿងអលង្ការ និងប៉ុនប៉ងរំលោ ប៉ុន្តែមិនបានសម្រេច ។
នគរបាលបានបានឲ្យដឹងថា ជនរងគ្រោះមានឈ្មោះ ស៊ីណា ភេទស្រី អាយុ ២១ឆ្នាំ រស់នៅ ក្រុងប៉ោយប៉ែត ខេត្តបន្ទាយមានជ័យ ។
នាងរងគ្រោះបានប្រាប់សមត្ថកិច្ចថា នៅមុនពេលកើតហេតុ នាងបានចេញពីធ្វើការនៅវេលាម៉ោង៣ទៀបភ្លឺ សំដៅមកផ្ទះ ដោយធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីលិចមកកើត មកដល់ចំណុចកើតហេតុ ស្រាប់តែក្មេងស្ទាវមួយក្រុមបាន ស្ទាក់ផ្លូវនាង រួចអូសនាងចូលអគារបាក់បែកស្ថានីយរថភ្លើងចាស់រួចក៏បានដោះគ្រឿងអលង្ការរបស់នាងអស់ មិនត្រឹមតែប៉ុណ្ណោះក្រុមនេះបង្ខំឲ្យនាងប្រើប្រាស់គ្រឿងញៀន ហើយមានបុរស២នាក់ក៏បានចាប់ហែកសម្លៀកបំពាក់នាងប៉ុនប៉ងរំលោភ និងគំរាមសម្លាប់ទៀតផង តែសំណាងល្អពេលនោះនាងរត់រួច ក៏បានរាយការណ៍ប្រាប់សមត្ថកិច្ចកងរាជអាវុធហត្ថក្រុងប៉ោយប៉ែតដើម្បីឲ្យជួយអន្តរាគមន៍។
ក្រោយពីទទួលពាក្យបណ្តឹងពីជនរងគ្រោះ សមត្ថកិច្ចកងរាជអាវុធហត្ថក្រុងប៉ោយប៉ែតក៏បាន ចុះទៅកាន់កើតហេតុដើម្បីស្រាវជ្រាវនិងឃាត់ខ្លួនសង្ស័យញៀនថ្នាំបែកគំនិតប្លន់ និងប៉ុនប៉ងរំលោភនារីរងគ្រោះខាងលើបានចំនួន ៦នាក់ ក្នុងនោះប្រុស៥នាក់ និងស្រីម្នាក់ដើម្បីសាកសួរធ្វើកំណត់ហេតុ និងកសាងសុំរឿងបញ្ជូនទៅតុលាការ ៕
ដោយ៖ វណ្ណា
