ខេត្តស្ទឹងត្រែង៖ នគរបាលស្រុកសៀមប៉ាង នៅជាប់នឹងព្រំប្រទល់ប្រទេសឡាវ បានប្រទះឃើញបុរសម្នាក់ដេកដួល ដោយមានស្នាមរបួសនិងមានឈាមហូរស្រោចពេញខ្លួន ថែមទាំងអក្រាតកាយនោះផងទៀត គ្រានោះបុរសនេះក៏ត្រូវបានក្រុមមន្ត្រីនគរបាល ជួយដឹកយកទៅសង្គ្រោះជីវិត នៅឯមន្ទីរពេទ្យបង្អែកខេត្ត ហើយគេមិនបានដឹងអំពីមូលហេតុ នៃការចាក់ខ្លួនឯងនេះទេ នគរបាលជំនាញបានដាក់ការសង្ស័យថា បុរសនេះមានសតិមិនសូវគ្រប់ ហើយប៉ុនប៉ងចាក់សម្លាប់ខ្លួនឯង ។
បុរសដែលរងរបួសមានឈាមហូរស្រោចពេញខ្លួននេះ ត្រូវគេប្រទះឃើញដេកដួលនៅចិញ្ចើមផ្លូវលំ១ខ្សែ ក្បែរព្រៃដាច់ស្រយាលមួយជិតព្រំដែនឡាវ កាលពីព្រឹកថ្ងៃ១៧ ខែធ្នូម្សិលមិញ ស្ថិតក្នុងភូមិសំរោង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង ។
អធិការនគរបាលស្រុកសៀមប៉ាង លោកវរៈសេនីយ៍ទោវ៉ា សុផាន់ បានបា្រប់ឲ្យដឹងថា បុរសរងគ្រោះនេះ គេមិនស្គាល់អត្តសញ្ញាណនោះទេ ហើយក៏មិនមែនជាអ្នកដែលរស់នៅក្នុងមូលដ្ឋានស្រុកសៀមប៉ាងនោះដែរ ។ លោកថា បុរសដែលរបួសនេះ ត្រូវបាននគរបាលប៉ុស្តិ៍រដ្ឋបាលឃុំស្រែសំបូរ ចុះជួយនាំយកទៅមន្ទីរពេទ្យ នៅបន្ទាប់ពីបានទទួលដំណឹងពីប្រជាពលរដ្ឋនៅមូលដ្ឋាននោះ រាយការណ៍ឲ្យបានដឹងនោះរួចមក ។
លោកអធិការស្រុកសៀមប៉ាងបានបន្តថា ក្រោយការជួយសង្គ្រោះបុរសនេះទៅកាន់មន្ទីរពេទ្យហើយនោះ មន្ត្រីជំនាញ នៃអធិការដ្ឋាននគរបាលស្រុក បានចុះស៊ើបអង្កេតលើករណីនេះ តែរកមិនឃើញពន្លឺរជុំវិញការចាក់បុរសនេះឲ្យរបួសនោះឡើយ ។ ចំណែក បុរសរងគ្រោះនេះ នៅមិនទាន់អាចសួរនាំបាននោះទេ ព្រោះគាត់មានរបួសធ្ងន់ធ្ងរពេក កំពុងជួយសង្គ្រោះបន្ទាន់ នៅក្នុងមន្ទីរពេទ្យបង្អែកខេត្តស្ទឹងត្រែង ៕
ដោយ៖ សាវុទ្ធ
