ខេត្តស្វាយរៀងៈ បុរសស្រវឹងខួបម្នាក់ត្រូវម៉ូតូអ្នករកត្រីបុកដួលលើថ្នល់ជាតិលេខ១ខណៈកំពុងដើរលើទ្រូងផ្លូវម៉ូតូ ហើយត្រូវរថយន្តបើកមកពីក្រោយកិនចំក្បាលបែកធ្លាយខួរស្លាប់ភ្លាមៗនៅនិងកន្លែងកាលពីវេលាម៉ោង៥និង១០នាទីព្រឹកថ្ងៃទី១៨ធ្នូ២០១៥នៅលើកំណាត់ផ្លូវជាតិលេខ១ស្ថិតនៅភូមិត្របែកប្រហោងឃុំតាសួសស្រុកស្វាយជ្រំ។
បើតាមមន្រ្តីនគបាលស្រុកស្វាយជ្រំបានឲ្យដឹងថាជនរងគ្រោះស្លាប់បាត់បង់ជីវិតឈ្មោះកៅ រឿងអាយុ៥៧ឆ្នាំមុខរបរកសិករមានទីលំនៅភូមិដូនលែបឃុំគោកព្រីងស្រុកស្វាយជ្រំ។
តាមសាក្សីបានប្រាប់ថា មុនថ្ងៃកើតហេតុគេឃើញជនរងគ្រោះដើរចេញពីភូមិគោកកណ្តោលឃុំគោកព្រីងស្រុកស្វាយជ្រំរួចដើរដល់ពាក់កណ្ដាលផ្លូវក៏ចូលទៅផ្ទះគេដើម្បីសុំស្រាផឹកដល់យប់និងដេកនៅផ្ទះអ្នកភូមិ។
ប្រភពបន្តថាលុះនៅព្រឹកទៀបភ្លឺបុរសខាងលើក៏បានឡើងដើរត្រឡប់មកផ្ទះវិញ គឺទំនងជាដើរនៅលើទ្រូងផ្លូវម៉ូតូ ស្របពេលនោះក៏មានអ្នករកត្រីជិះម៉ូតូ ឌុបគ្នាត្រឡប់មកពីរកត្រី បើកម៉ូតូពីទឹសខាងលិចមកកើតស្របទឹសគ្នាក៏បុកពីក្រោយបណ្តាលឲ្យជនរងគ្រោះដួលដេកទៅលើថ្នល់ហើយក៏មានរថយន្តមួយគ្រឿងទៀតបើកស្របទឹសគ្នាដែរបើកមកពីក្រោយចាប់ហ្វ្រាំងមិនទាន់ក៏កិនចំក្បាលជនរងគ្រោះបែកធ្លាយខួរស្លាប់ភ្លាមៗនៅនិងកន្លែង។
រីឯអ្នក
បើកម៉ូតូបានរេចង្កូតដួលបោកទៅលើចិញ្ចើមថ្នល់អុសទាំងមនុស្សនិងម៉ូតូធ្លាក់ចូលស្រះទឹកហាវថ្នល់ក៏ប៉ុន្តែគ្មានឃើញមនុស្សណាម្នាក់នៅកន្លែងកើតហេតុទេ គឺឃើញតែដានម៉ូតូនិងឈាម ធ្មេញលើមួយក្រាស់ ស្បែកជើងផ្ទាត់៤គូរ ទ្រុងដាក់ត្រីនិងត្រី ពិលពាក់ក្បាលមួយ។រីឯរថយន្តបង្កបានបើកគេចមកកើតចូលក្រុងស្វាយរៀងបាត់ស្រមោល។
រីឯសមត្ថកិច្ចនគបាលកំពុងស្រាវជ្រាវរកអ្នកបើកម៉ូតូដើម្បីសាកសួរដោយអ្នកបើកម៉ូតូនិងអ្នករួមដំណើររងរបួសធ្ងន់បន្សល់ឈាមក្រហមច្រាលនៅលើភ្លឺស្រះ។រីឯសពជនរងគ្រោះសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
