ខេត្តពោធិ៍សាត់៖ កម្លាំងសមត្ថកិច្ចចម្រុះរួមមាន មន្ត្រីជំនាញខណ្ឌ ផ្នែក សង្កាត់រដ្ឋបាលជលផល អាវុធហត្ថ នគរបាល យោធា សហគមន៍នេសាទ សរុបប្រមាណ ៣០នាក់ដឹកនាំដោយលោកសឺន សាក់សារ៉ាន់ អភិបាលរងស្រុកបាកាន ចុះផ្សព្វផ្សាយអំពីផលប៉ះពាល់ច្បាប់ស្ដីពីជលផល និងបង្ក្រាបបទល្មើសនេសាទក្នុងមូលដ្ឋានរបស់ន្លួននៅបឹងទនេ្លសាប ។
ករណីចម្រុះចុះផ្សព្វផ្សាយ និងបង្ក្រាបបទល្មើសនេសាទខាងលើ នេះធ្វើឡើងកាលពីរសៀលថ្ងៃទី២០ ខែធ្នូ ឆ្នាំ២០១៥ នៅបឹងទន្លេសាប ត្រង់ចំណុចក្រឡុកជ្រោយស្វាយ ស្ថិតក្នុងភូមិដីរនាត ឃុំមេទឹក ស្រុកបាកាន ខេត្តពោធិ៍សាត់ ។
តាមប្រភពពីកម្លាំងចុះប្រតិបត្តិការ បានឱ្យដឹងថា មុននឹងឈានដល់ការបង្ក្រាបបទល្មើសនេសាទ កម្លាំងសមត្ថកិច្ចប្រមាណ ៣០នាក់ ដែលដឹកនាំដោយលោកអភិបាលរងស្រុកបាកាន បានកោះអញ្ជើញប្រជាពលរដ្ឋដើម្បីចូលរួម ស្ដាប់ការផ្សព្វផ្សាយអំពីផលប៉ះពាល់ពាក់ព័ន្ធនឹងបទល្មើសនេសាទដោយប្រើឧបករណ៍ខុសច្បាប់ ស្ដីពីជលផល រួចកម្លាំងចុះបង្ក្រាបតែម្ដង ។
ប្រភពបន្ដថា លទ្ធផលក្នុងការបង្ក្រាបរួមមាន បទល្មើសប្រភេទឧបករណ៍ថ្មី (បរ) ដែលគ្មានក្នុងប្រកាសក្រសួងកសិកម្ម រុក្ខាប្រម៉ាញ់ និងនេសាទ បានចំនួន ៦ខ្សែ មានប្រវែង ១៦០០ម៉ែត្រ, បង្គោលចំរ៉ឹងចំនួន ៣០០ដើម និងរឹបអូសក្បាលបរចំនួន ៦គ្រឿង ព្រមទាំងចាក់លែងត្រីចម្រុះចូលក្នុងទឹកបឹងទន្លេសាបវិញចំនួន ២០០០គីឡូក្រាម ។
ប្រភពបន្ដទៀតថា វត្ថុតាងដែលកម្លាំងសមត្ថកិច្ចរឹបអូសបាន យកទៅរក្សាទុកនៅស្នាក់ការផ្នែករដ្ឋបាលជលផល ហើយសមត្ថកិច្ចតម្រូវឱ្យប្រជាពលរដ្ឋប្រកបរបរខុសច្បាប់ស្ដីពីជលផលខាងលើ រួសរើដោយខ្លួនឯង ពុំដូច្នោះទេកម្លាំងនឹងបន្តបង្ក្រាបជានិច្ចនិងមានវិធានការកសាងសំណុំរឿងជនដែលបានប្រព្រឹត្តតាមនីតិវិធីផងដែរ ៕
ដោយ៖ ប៉ឹម ពិន
