ស្ថានភាពនយោបាយនៅក្នុងប្រទេសវេណេហ្ស៊ុយអេឡា បានស្ងាប់ស្ងាត់ជាងមុន ហើយ រាល់ប្រព័ន្ធផ្សព្វផ្សាយធំ ៗបានបង្វែរការចាប់អារម្មណ៍ មកកាន់តំបន់អាស៊ី ក្នុងនោះមានកិច្ចប្រជុំ G-20 និងជំនួប លើកទី៣ រវាងលោកត្រាំ និងគីម ជុងអ៊ុន។
ក្រៅពីនេះភាពតានតឹងរវាងអាមេរិកនិងអ៊ីរ៉ង់នៅតំបន់មជ្ឈឹមបូព៌ាស្ទើតែផ្ទុះសង្គ្រាមជាទ្រង់ទ្រាយធំ ។ ចំណុចទាំងនោះហើយបានជា ស្ថានភាពនៅក្នុងប្រទេសវេណេហ្ស៊ុយអេឡា មិនស៊ូវមានការផ្សព្វផ្សាយច្រើនប៉ុន្មានសប្តាហ៍ចុងក្រោយនេះ។
សារព័ត៌មាន AP បានផ្សាយថាប្រធានាធិបតី វេណេហ្ស៊ុយអេឡា លោក Nicolas Maduro និងគណប្រតិភូរបស់មេដឹកនាំក្រុមប្រឆាំងលោក Juan Guaido នឹងបន្តកិច្ចពិភាក្សា ស្វែងរកដំណោះស្រាយបញ្ចប់វិបត្តិ នៅក្នុងប្រទេស អាមេរិកខាងត្បូង មួយនេះ។
នៅពេលនេះ ភាគីទាំងពីរមិនទាន់សម្រេចថាតើ នឹងរៀបចំជំនួប ពិភាក្សានៅទីក្រុង Oslo ប្រទេស Norway ឬ Barbados ។ តាមគម្រោង ភាគីទាំងពីរនឹងពិភាក្សាគ្នានៅសប្តាហ៍ក្រោយ។ នៅពេលនេះរដ្ឋាភិបាល វេណេហ្ស៊ុយអេឡា មិនបានលើកឡើងជុំវិញព័ត៌មាននៃជំនួបពិភាក្សាខាងលើនៅឡើយ។ កន្លងក លោក Juan Guaido បានប្រកាសថា លោកទទួលបានការផ្តល់ប្រឹក្សា ពីមេដឹកនាំ នៅក្រៅប្រទេស ពីជំនួបពិភាក្សា នាពេលខាងមុខ។
កាលពីខែឧសភា កន្លងមក រដ្ឋាភិបាលប្រទេស Norway បានធ្វើជាអាជ្ញាកណ្តាល រៀបចំកិច្ចពិភាក្សាសម្រាប់រដ្ឋាភិបាលរបស់ប្រធានាធិបតី ម៉ាឌូរ៉ូ និង មេដឹកនាំក្រុមប្រឆាំងនៅទីក្រុង Oslo ។ ប៉ុន្តែភាគីទាំងពីរ មិនទទួលបានកិច្ចព្រមព្រៀងណាមួយនោះឡើយ ។
នៅពេលនេះដែរ ភាគីទំាងពីរនឹងបន្តពិភាក្សា នៅពេលខាងមុខ ដើម្បីស្វែងរក ដំណោះស្រាយបញ្ចប់វិវាទ នៅក្នុងប្រទេសនេះ ដើម្បីពង្រឹងវិស័យសេដ្ឋកិច្ច។ កន្លងមកទាំងរុស្ស៊ីនិងចិន បានផ្តល់ជំនួយជាច្រើនទៅឲ្យវេណេហ្ស៊ុយអេឡា ។ ចំណែករដ្ឋាភិបាល របស់ប្រធានាធិបតីម៉ាឌូរ៉ូ ក៏បានសម្រេចបើកទ្វារព្រំដែន ជាប់ប្រទេសកូឡំប៊ីឡើងវិញ ផងដែរ៕ សាធី
