ខេត្តកណ្តាល៖ គ្រោះថ្នាក់ចរាចរណ៍មួយបណ្តាលឲ្យយុវជនម្នាក់រងរបួសស្រាល តែម៉ូតូត្រូវដាច់កង់មុខចេញពីតួបាត់ ។ ហេតុការណ៍នេះកើតឡើងកាលពីវេលាម៉ោង៧និង៣០នាទីព្រឹក ថ្ងៃទី២១ ខែធ្នូ ឆ្នាំ២០១៥ នៅតាមបណ្តោយផ្លូវជាតិលេខ៦ ក្នុងភូមិកោះរការ ឃុំព្រែកអញ្ចាញ ស្រុកមុខកំពូល ខេត្តកណ្តាល ។
យុវជនរងគ្រោះឈ្មោះរ៉ុម ពន្លឺ អាយុ២៤ឆ្នាំ ជាសន្តិសុខឯកជន ស្នាក់នៅភូមិដើមជ្រៃ ឃុំរកាកោងទី២ ស្រុកមុខកំពូល ខេត្តកណ្តាល ។
តាមការឲ្យដឹងពីយុវជនរងគ្រោះនិយាយថា មុនពេលកើតហេតុ រូបគេបានជិះម៉ូតូមួយគ្រឿងម៉ាកសង់កូរ៉េ ពណ៍ក្រហម ពាក់ស្លាកលេខ ជ៥៩៦៩ ភព១ ដែលបានធ្វើដំណើរពីទិសខាងជើងមកត្បូង ស្របទិសជាមួយរថយន្ត ក្រុង និងរ៉ឺម៉កដឹកបន្លែ ខណៈនោះ រូបគេ បានជិះម៉ូតូចូលប្រឡោះកណ្តាលហើយត្រូវកង់មុខរថយន្តបុកដាច់កង់ម៉ូតូបាត់ ក៏ដួលទៅលើទ្រូងផ្លូវ ចំណែករថយន្តក៏បើកទៅបាត់ដោយមិនឈប់ដើម្បីទទួខុសត្រូវ។ គ្រោះថ្នាក់នេះ មានរយៈពេលជិតមួយម៉ោងទៅហើយ ពុំឃើញមានសមត្ថកិច្ចមកអន្តរាគមន៍សោះ ។
បន្ទាប់មកជនរងគ្រោះបានទូរស័ព្ទហៅក្រុមគ្រួសារមកទទួលយកទៅព្យាបាលនៅមន្ទីរពេទ្យឯកជនដោយខ្លួនឯង ៕
ដោយ៖ ឡូ សំអាត
