ភ្នំពេញ៖ បើទោះបីអត្តពលិកកម្ពុជា រកបានមេដាយចំនួន៩គ្រឿងពីព្រឹត្តិការណ៍ ប្រកួតកីឡាប៉េតង់ ជ្រើសរើសជើងឯកអាស៊ីលើកទី១៩ ក្នុងឋានៈជាម្ចាស់ក្តី ប៉ុន្តែបានត្រឹមឈរនៅលេខរៀងទី២ប៉ុណ្ណោះខណៈ ដែលក្រុមកីឡាករកីឡាការិនី មកពីប្រទេសថៃ រកបាមមេដាយ៥គ្រឿងឈរនៅលំដាប់លេខរៀងទី១- ក្រោយពីដណ្តើមបាន មេដាយ មាស ចំនួន៤គ្រឿង មេដាយប្រាក់សូន្យ និងមេដាយសំរឹទ្ធិ៣គ្រឿង ក្នុងការ ប្រកួតដ៏តឹងតែង អស់រយៈពេល៣ថ្ងៃដោយមានអត្តពលិកមកពី១២ ប្រទេសចូលរួមនិង បានបញ្ចប់កាលពីល្ងាចថ្ងៃទី១៩ខែធ្នូឆ្នាំ២០១៥ នៅទីលានប៊ូលនិងប៉េតង់ ក្នុងពហុកីឡដ្ឋានជាតិ រាជធានីភ្នំពេញ។
មេដាយទាំង៩ដែលក្រុមកីឡាករ កីឡាការិនីកម្ពុជាដណ្តើមបាន គឺមេដាយមាស១គ្រឿង មេដាយប្រាក់៣គ្រឿង និងមេដាយសំរឹទ្ធិ៥គ្រឿង ក្នុងចំណោមកីឡាករ កីឡាការិនីសរុប១៧៦នាក់ ក្នុងនោះកម្ពុជាជាម្ចាស់ផ្ទះមានកីឡាករ កីឡាការិនី៣១នាក់ ឡាវ១៤នាក់ ,វៀតណាម១៥នាក់, ម៉ាឡេស៊ី១៥នាក់ , ឥណ្ឌូនេស៊ី១៣នាក់, ប្រ៊ុយណេ១៥នាក់, សិង្ហបុរី១៤នាក់,ថៃ២៣នាក់ ,ចិនតៃវ៉ាន់២០នាក់ ,ជប៉ុន១៨នាក់ ,ឥណ្ឌា៩នាក់ និងម៉ុងហ្គោលី៤នាក់ និងមានវិញ្ញាសាចំនួន៦ដាក់ឲ្យប្រកួត ដូចជាវិញ្ញាសាវាយយកពិន្ទុផ្នែកបុរស- នារី និងយុវជន វិញ្ញាសាប្រកួតជាក្រុម៣នាក់ទល់៣នាក់បុរស វិញ្ញាសាប្រកួតជាក្រុម៣នាក់ទល់៣នាក់ នារី និងប្រកួតជាក្រុម៣នាក់ទល់៣នាក់ យុវជន។
តាមរយៈការប្រកួត៣ថ្ងៃពេញ ក្រុមកីឡាករកីឡាការិនី មកពីប្រទេសថៃរកបានមេដាយមាសច្រើនជាងគេ ឈរនៅលំដាប់លេខរៀងទី១ ដោយមេដាយមាស៤គ្រឿង និងមេដាយសំរឹទ្ធិ៣គ្រឿង ប៉ុន្តែគ្មានមេដាយ ប្រាក់នោះទេ។
ម្ចាស់ផ្ទះកម្ពុជា ស្ថិតនៅលំដាប់លេខរៀងទី២បានមេដាយមាស១គ្រឿងមេដាយប្រាក់៣គ្រឿង និងមេដាយសំរឹទ្ធិ៥ គ្រឿង ក្នុងនោះមេដាយមាសរកបានដោយកីឡាករ សុខ ចាន់មៀន លើវិញ្ញាសាវាយយកពិន្ទុផ្នែកបុរស , មេដាយប្រាក់៣គ្រឿង រកបានដោយកីឡាករ មួង ទិត្យម៉ាណែត វិញ្ញាសាវាយយកពិន្ទុផ្នែកយុវជន , វិញ្ញាសាប្រកួតជាក្រុម៣នាក់ទល់៣នាក់ផ្នែកយុវជន និងមេដាយប្រាក់២គ្រឿងទៀត រកបានលើវិញ្ញាសាប្រកួតជាក្រុម៣នាក់ទល់៣នាក់ផ្នែកនារី។
ចំពោះមេដាយសំរឹទ្ធិ៥គ្រឿងនោះ គឺ២គ្រឿងរកបានលើវិញ្ញាសាវាយយកពិន្ទុផ្នែកយុវជន ,មេដាយសំរឹទ្ធិ១គ្រឿងទៀត រកបានលើវិញ្ញាសាវាយពិន្ទុផ្នែកបុរស , វិញ្ញាសាប្រកួតជាក្រុម៣បីនាក់ទល់៣នាក់នារីបាន១គ្រឿង និង វិញ្ញាសាប្រកួត៣នាក់ទល់៣នាក់យុវជន រកបាន១គ្រឿង។
ក្រុមកីឡាករ ចិនតៃវ៉ាន់ ស្ថិតនៅលំដាប់លេខ៣ មានមេដាយមាស១គ្រឿង លើវិញ្ញាសាវាយយកពិន្ទុផ្នែកយុវជន។ ប្រទេសឡាវ បានមេដាយ ប្រាក់១គ្រឿង និងមេដាយសំរឹទ្ធិ២គ្រឿង ប្រទេសវៀតណាម រកបានមេដាយប្រាក់១គ្រឿងនិងមេដាយសំរឹទ្ធិ១គ្រឿង សិង្ហបុរីរកបានមេដាយប្រាក់១គ្រឿង និងប្រទេសឥណ្ឌូនេស៊ី រកបានមេដាយសំរឹទ្ធិ១គ្រឿង។
គួររំលឹកថា កម្ពុជាបានថយចុះចំនួនមេដាយជាច្រើន បើប្រៀបធៀប ការប្រកួតប៉េតង់ជើងឯកអាស៊ីទី១៨ នៅប្រទេសឡាវដែលមានប្រទេសចំនួន១២ចូលរួមដែរ គឺកម្ពុជាស្ថិតនៅលេខរៀងទី១ ដោយដណ្ដើមបានមេដាយសរុបចំនួន៥គ្រឿង ក្នុងនោះមេដាយមាស៤គ្រឿង និងមេដាយប្រាក់ ១គ្រឿង៕
ដោយ៖ សារីម
