ខេត្តតាកែវ៖ ក្រុមបាល់ទាត់នារី មន្ទីរអប់រំយុវជននិងកីឡា ខេត្តបាត់ដំបង ត្រូវឡើងទៅប្រកួតដណ្តើម តំណែងជើងឯកថ្នាក់ជាតិជាមួយក្រុមបាល់ទាត់នារី របស់មន្ទីរអប់រំយុវជននិងកីឡា ខេត្តស្វាយរៀងនៅ វេលាម៉ោង៣រសៀលថ្ងៃទី២៣ខែធ្នូ ។ ចំណែកក្រុមសមាគមកីឡាបាល់ទាត់នារីខេត្តសៀមរាបប្រជែងយកចំណាត់ថ្នាក់លេខ៣ជាមួយក្រុមកីឡាការិនីមកពីមន្ទីរអប់រំយុវជននិងកីឡាខេត្តកំពង់ឆ្នាំងនាវេលាម៉ោង៨និង៣០នាទីព្រឹកថ្ងៃទី២៣ខែធ្នូ ឆ្នាំ២០១៥ នៅលើទីលាន សាលាបាល់ទាត់បាទី។
មន្ត្រីព័ត៌មាន របស់សហព័ន្ធកីឡាបាល់ទាត់កម្ពុជា លោក ចាន់ មិថុនា បានឲ្យដឹងថា ចំពោះ ដំណើរការប្រកួត វគ្គពាក់កណ្តាលផ្តាច់ព្រ័ត្រនិងផ្តាច់ព្រ័ត្រខាងលើ ក្រោយពីបានដំណើរការប្រកួត វគ្គជម្រុះវិលជុំសន្សំពិន្ទុតាមពូល A និងពូល B ត្រូវបានបញ្ចប់កាលពីថ្ងៃទី ២០ខែធ្នូ ឆ្នាំ២០១៥ ក្នុងនោះ ក្រុមដែលជាប់ចំណាត់ថ្នាក់លេខ១ពូល A ត្រូវជួបប្រកួតជាមួយក្រុមលេខ២ពូល B និងក្រុមលេខ ២ ពូល A ប្រកួតជាមួយក្រុមលេខ១ពូល B កាលពីថ្ងៃទី២១ខែធ្នូ ឆ្នាំ២០១៥កន្លងទៅ។
មន្ត្រីព័ត៌មាន ដដែលបានឲ្យដឹងថា ក្រុមកីឡាការិនី មកពី ខេត្តបាត់ដំបង និងក្រុមកីឡាការិនី មកពីខេត្តស្វាយរៀង ពួកគេត្រូវឡើងទៅប្រកួត វគ្គផ្តាច់ព្រ័ត្រ ដើម្បី ដណ្តើមយកចំណាត់ថ្នាក់លេខ១និងលេខ២ ជើងឯកថ្នាក់ជាតិប្រចាំឆ្នាំ២០១៥ ក្រោយពីក្រុមបាល់ទាត់ស្ត្រីទាំង២ក្រុម នេះលេងឈ្នះគូប្រកួតក្នុងវគ្គពាក កណ្តាលផ្តាច់ព្រ័ត្រកាលពីថ្ងៃទី២១ខែធ្នូ ឆ្នាំ២០១៥ ។
ប្រភពព័ត៌មានខាងលើបានបន្តទៀតថា ក្រុមកីឡាការិនី មកពី មន្ទីរអប់រំយុវជននិងកីឡា ខេត្តបាត់ដំ បងបានលេងឈ្នះក្រុមកីឡាការិនី មកពី សមាគមកីឡាបាល់ទាត់ខេត្តសៀមរាប ក្នុងលទ្ធផល ៨-០ រីឯក្រុម បាល់ទាត់នារី មកពីមន្ទីរអប់រំយុវជននិងកីឡា ខេត្តស្វាយរៀងបានលេងឈ្នះក្រុមកីឡាការិនី មកពី មន្ទីរអប់រំយុវជននិងកីឡាខេត្តកំពង់ឆ្នាំង ក្នុងលទ្ធផល៦-០ នៅលើទីលានសាលាបាល់ទាត់បាទី។
គួររំលឹកថា កាលពីក្រុមបាល់ទាត់ស្ត្រីទាំង៤ក្រុមខាងលើប្រកួតវគ្គសន្សំពិន្ទុក្នុងពូលកន្លងទៅគឺ ក្រុម កីឡាការិនីមន្ទីរ អប់រំយុវជននិងកីឡា ខេត្តបាត់ដំបង ធ្លាប់លេងឈ្នះ ក្រុមកីឡាការិនី របស់មន្ទីរអប់រំយុវជន និងកីឡា ខេត្តស្វាយរៀង ក្នុងលទ្ធផល៣-០ កាលពីថ្ងៃទី១៥ខែធ្នូ ឆ្នាំ២០១៥ ។ រីឯក្រុមកីឡាការិនី សមាគមកីឡាបាល់ទាត់ខេត្តសៀមរាប លេងចាញ់ ក្រុមកីឡាការិនី មកពីមន្ទីរអប់រំយុវជននិងកីឡាខេត្តកំពង់ឆ្នាំង ក្នុងលទ្ធផល៥-១ កាលពីរសៀល ថ្ងៃទី១៧ ខែ ធ្នូឆ្នាំ២០១៥ ក្នុងវគ្គជម្រុះតាមពូល B ៕
ដោយ៖ សារីម
