ក្រសួងការពារជាតិអាហ្វហ្គានីស្ថាន កាលពីថ្ងៃទី២២ ខែធ្នូ ឆ្នាំ២០១៥បានប្រកាសថា ក្រុមខឧទ្ទាមតាលីបង់៣៤នាក់បានបាត់បង់ជីវិត និង១០នាក់ផ្សេងទៀតរងរបួស ខណៈដែលកងកម្លាំងសន្តិសុខអាហ្វហ្គានីស្ថានបានធ្វើប្រតិបត្តិការបោសសម្អាតក្រុមឧទ្ទាមនៅក្នុងខេត្តផ្សេងៗគ្នាក្នុងរយៈពេល២៤ម៉ោងនោះ ។
មន្ត្រីជាន់ខ្ពស់ក្រសួងការពារជាតិអាហ្វហ្គានីស្ថានបានថ្លែងថា ប្រតិបត្តិការវាយឆ្មក់របស់កងកម្លាំងយោធាអាហ្វហ្គានីស្ថានបានធ្វើឡើងនៅក្នុងខេត្ត Helmand, Logar, Kunar, Nangarhar និងខេត្ត Kunduz ។ ជាមួយគ្នានេះ កងកម្លាំងយោធាបានរិបអូសអាវុធយុទ្ធភ័ណ្ឌជាច្រើន ព្រមទាំងដោះគ្រាប់មីនជាច្រើនគ្រាប់ផងដែរ ។
ក្នុងអំឡុងពេលជាមួយគ្នានេះដែរ ខាងកងកម្លាំងសន្តិសុខអាហ្វហ្គានីស្ថានបានបាត់បង់ជីវិត៦នាក់អំឡុងប្រយុទ្ធជាមួយក្រុមឧទ្ទាមតាលីបង់ ។
អំពើហិង្សាបង្កឡើងដោយក្រុមឧទ្ទាមតាលីបង់បានបន្តកើតឡើងនៅក្នុងទឹកដីអាហ្វហ្គានីស្ថាន ។ កងកម្លាំងសន្តិសុខរបស់ប្រទេសនេះបានធ្វើប្រតិបត្តិការបោសសម្អាត់ក្រុមឧទ្ទាមនៅតាមបណ្តាខេត្តដាច់ស្រយាល់ ជាពិសេសតំបន់ស្មុគស្មាញ និងតាមបន្ទាត់ព្រំដែន ។
ជាការឆ្លើយតបចំពោះកងកម្លាំងសន្តិសុខខាងលើនេះ ក្រុមឧទ្ទាមតាលីបង់បានវាយប្រហារដោយបំផ្ទុះគ្រាប់បែកផ្សេងៗទៅលើកងកម្លាំងយោធាដើម្បីជាការសងសឹក ។
ក្រុមឧទ្ទាមតាលីបង់នៅមិនទាន់ធ្វើអត្ថាធិប្បាយបែបណាជុំវិញការអះអាងរបស់ក្រសួងការពារជាតិអាហ្វហ្គានីស្ថានដែលថាបានសម្លាប់ក្រុមឧទ្ទាម៣៤នាក់ និងរងរបួស១០នាក់ ក្នុងប្រតិបត្តិការបោសសម្អាតនេះនៅឡើយទេ ៕
ប្រែសម្រួល៖ ថាច់ យ៉ាត
