ខេត្តស្វាយរៀង៖ មានគ្រោះថ្នាក់ចរាចរណដ៏អាក្រក់រវាងម៉ូតូនិងម៉ូតូបណ្តាលឲ្យបុរសម្នាក់ស្លាប់ភ្លាមៗនៅនឹងកន្លែង និងយុវជន២នាក់ជាជនជាតិវៀតណាមរងរបួសធ្ងន់ធ្ងរសន្លប់នៅនឹងកន្លែង កាលពីថ្ងៃទី២១ ខែធ្នូ ឆ្នាំ២០១៥នៅវេលាម៉ោង៤ និង៣០នាទីរសៀលនៅលើផ្លូវលំខាងកើតវត្តដូងថ្មី៥០ម៉ែត្រស្ថិតនៅភូមិដូង ឃុំដូង ស្រុករមាសហែក ។

បើតាមសមត្ថកិច្ចនគរបាលស្រុករមាសហែកបានឲ្យដឹងថា ជនរងគ្រោះមានឈ្មោះ សៅផា ភេទប្រុស អាយុ៦៥ឆ្នាំជាកសិករមានទីលំនៅភូមិឃុំកើតហេតុខាងលើបានស្លាប់ភ្លាមៗនៅនឹងកន្លែង រីឯជនបង្កឈ្មោះង្វៀង វ៉ាឡម ភេទប្រុស អាយុ២៣ឆ្នាំជាជនជាតិវៀតណាមរស់នៅភូមិផាន់តឹង ឃុំផានឡុង ស្រុកចាវថាញ់ ខេត្តតៃនិញ ប្រទេសវៀតណាមរបួសធ្ងន់ និងអ្នករួមដំណើរឈ្មោះរត់សាណាត់ ភេទប្រុស អាយុ២១ឆ្នាំជនជាតិវៀតណាមដើមកំណើតខ្មែរមានទៅលំនៅភូមិហេបផាង ឃុំវ៉ាថាន់ ស្រុកចាវថាញ់ ខេត្តតៃនិញប្រទេសវៀតណាមរបួសធ្ងន់ធ្ងរសន្លប់នៅនឹងកន្លែង ។

បើតាមប្រជាពលរដ្ឋដែលបានឃើញផ្ទាល់ភ្នែកបានប្រាប់ឲ្យដឹងថា មុនពេលកើតហេតុគេឃើញជនរងគ្រោះឈ្មោះសៅផា ជិះម៉ូតូម៉ាកហុងដា សេ១២៥ ពណ៌ខ្មៅ ស៊េរី២០១៤ ពាក់ស្លាកលេខស្វាយរៀង1D-7148 បើកបរពីទិសខាងកើតមកលិច(មកពីប្រទេសវៀតណាមចូលមកខ្មែរវិញ)ខាងស្តាំដៃស្របពេលនោះក៏មានឈ្មោះង្វៀងវ៉ាឡម ជនជាតិវៀតណាមជិះម៉ូតូម៉ាកហុងដាវ៉េវ សេ១១០ ពណ៌ទឹកប៊ិចចាស់ ពាក់ស្លាកលេខ៧០L៦_៨៧១២ បើកពីទិសខាងលិចទៅកើតបញ្ច្រាសទិសគ្នាយ៉ាងលឿន ក្នុងស្ថានភាពស្រវឹងជោគក៏រេចង្កូតមកឆ្វេងទៅបុកម៉ូតូជនរងគ្រោះចំពីមុខពេញទំហឹងលាន់ដូចរន្ទះបណ្តាលឲ្យដួលបោកក្បាលទៅលើថ្នល់បែកក្បាលស្លាប់ភ្លាមៗនៅនឹងកន្លែង រីឯជនបង្កនិងអ្នករួមដំណើររងបួសធ្ងន់សន្លប់នៅនឹងកន្លែងហើយត្រូវសមត្ថកិច្ចវៀតណាមមកធានាបញ្ជូនទៅមន្ទីរពេទ្យប្រទេសវៀតណាមដើម្បីសង្គ្រោះ ។

រីឯសពជនរងគ្រោះស្លាប់បាត់បង់ជីវិតសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំពោះវត្ថុតាងម៉ូតូទាំង២គ្រឿងត្រូវបានសមត្ថកិច្ចនគរបាលអូសមកកាន់អធិការដ្ឋាននគបាលស្រុករមាសហែកដោះស្រាយបន្តតាមច្បាប់ ៕

ដោយ៖ យឹម សុថាន