ខេត្តសៀមរាប៖ ជនសង្ស័យប្រើប្រាស់គ្រឿងញៀនប្រុសស្រីចំនួន៦នាក់ និងវត្ថុតាងជាច្រើនទៀត ត្រូវបាននគរបាលប្រឆាំងគ្រឿងញៀខេត្តបានសហការជាមួយប៉ុស្តិ៍បញ្ជូនទៅតុលាការ ដើម្បីចាត់វិធានការតាមច្បាប់ ខណៈពួកគេកំពុងចែកចាយ តាមដងផ្លូវសាធារណៈ ក្នុងតំបន់ទេសចរណ៍ ។
ការចុះបង្ក្រាបករណីជួញដូរគ្រឿងញៀននេះធ្វើឡើងនៅថ្ងៃទី២២និងទី២៣ខែធ្នូឆ្នាំ២០១៥ស្ថិតនៅចំនុចក្នុងសង្កាត់២ផ្សេងគ្នា គឺសង្កាត់ជ្រាវ និងសង្កាត់គោកចក ក្រុងសៀមរាប ។
លោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀននៃស្នងការនគរបាលខេត្តបានឲ្យដឹងថា កម្លាំងជំនាញ បានឃាត់ខ្លួនជនសង្ស័យ ចំនួន៦នាក់រួមមាន ទី១/ឈ្មោះ ឈាន ឈុនលី ភេទប្រុស អាយុ២៨ឆ្នាំ មុខរបរព្រូឡានតាក់ស៊ី រស់នៅភូមិវាលម្លូរ ឃុំវាលម្លូរ ស្រុកពញាក្រែក ខេត្តត្បូងឃ្មុំ (ចាត់ចែងឱ្យប្រើប្រាស់) ទី២/ឈ្មោះ សឿម ផា ហៅផន ភេទប្រុសអាយុ៣៥ឆ្នាំមុខរបរលើកឥវ៉ាន់ មានស្រុកកំណើតភូមិត្រពាំងថ្នល់ ឃុំកន្ទ្រាំង ស្រុកប្រាសាទបាគង ខេត្តសៀមរាប (ចាត់ចែងឱ្យប្រើប្រាស់)អ្នកទាំង២នាក់ ឃាត់ខ្លួននៅវេលាម៉ោង២១និង២០នាទីថ្ងៃទី២២ខែ ធ្នូឆ្នាំ២០១៥ ស្ថិតនៅចំនុចភូមិខា្នរ សង្កាត់ជ្រាវ ក្រុងសៀមរាប ។ទី៣/ឈ្មោះ កន រ៉ាត់ ភេទប្រុសអាយុ២០ឆ្នាំមុខរបរកម្មករសំណង់ មានស្រុកកំណើតភូមិតាព្រហ្ម ឃុំសង្វើយ សុ្រកជីក្រែង ខេត្តសៀមរាប (ចាត់ចែងឱ្យប្រើប្រាស់)ទី៤/ឈ្មោះ លុយ ឡី ភេទ ប្រុស អាយុ២៥ឆ្នាំមុខរបរបកម្មករសំណង់បច្ចុប្បន្នរស់នៅ ភូមិវាល សង្កាត់គោកចក ក្រុងសៀមរាប(ជួញដូរ) ទី៥/ឈ្មោះ លុយ លិរឺ ឆមលិ ភេទប្រុសអាយុ២៦ឆ្នាំ មុខរបរយោធា រស់នៅ ភូមិវាល សង្កាត់គោកចក ក្រុងសៀមរាប(ជួញដូរ)និងទី៦/ឈ្មោះ សុខ គឹមអាង ហៅកោន ភេទប្រុសអាយុ២៦ឆ្នាំមុខរបរកម្មករសំណង់ ចាត់ចែងនិងសម្រួលឱ្យប្រើប្រាស់ ។
លោកបានបន្តថា ក្រោយពីធ្វើការឃាត់ខ្លួនជនសង្ស័យខាងលើ កម្លាំងជំនាញ បានធ្វើការដកហូតវត្ថុតាងរួមមាន៖ ទូរស័ព្ទដៃ៣គ្រឿង, ម្សៅមេតំហ្វេតាមីនចំនួន១កញ្ចប់ស្មើទម្ងន់០,២ក្រាម និងឧបករណ៏ប្រើប្រាស់ថ្នាំញៀនមួយចំនួនផងដែរ ។
បច្ចុប្បន្នជនសង្ស័យ ចំនួន៦នាក់ និងវត្ថុតាងត្រូវបានកម្លាំងជំនាញកសាងសំណុំរឿងបញ្ជូនទៅតុលាការនៅ ថ្ងៃទី២៤ ខែធ្នូ ឆ្នាំ២០១៥ ដើម្បីចាត់ការតាមនីតិវិធីច្បាប់ ៕
ដោយ៖ ជានិរន្ដរ៍
