ខេត្ដសៀមរាប៖ កំពែងអង្គរធំប្រវែង ៨ម៉ែត្រស្ថិតនៅភាគឦសាន ដែលបាន ទទួលរងការបាក់រលំក្នុងអំឡុងពេលខ្យល់ព្យុះកេតសាណាកាលពីឆ្នាំ២០១១កន្លង ទៅឥឡូវត្រូវបានអ្នកជំនាញខ្មែរជួសជុលរួចរាល់ជាស្ថាពរហើយ ។ ក្រុមអ្នកជំនាញ ខ្មែរដដែលគ្រោងនឹងជួសជុលបន្ដទៀត នូវកំពែងអង្គរធំដែលទទួលរងការបាក់ បែកជាច្រើនកន្លែងទៀតដោយសារខ្យល់ ព្យុះនេះ ។
លោក ម៉ៅ សុខនី អ្នកជំនាញការ ជួសជុលប្រាសាទនៃអាជ្ញាធរជាតិអប្សរាបានឱ្យដឹងថា ខ្យល់ព្យុះកេតសាណាកាល ពីឆ្នាំ២០១១កន្លងមកបានធ្វើឱ្យកំពែង អង្គរធំភាគឦសានរងការបាក់រលំចំនួន៤កន្លែង ។ ក្រោយពីបានធ្វើការសិក្សា និងទល់ទ្រចំណុចប្រេះស្រាំជាច្រើនកន្លែងមកក្រុមអ្នកជំនាញក៏បានចាប់ផ្ដើមធ្វើការជួសជុលឡើងវិញចាប់ពីឆ្នាំ២០១៤មកដោយជ្រើសរើសជ្រុងឦសានមុនគេ ដើម្បីបញ្ចៀសការប៉ះពាល់ដល់កូន ប្រាសាទជ្រុង ដែលស្ថិតនៅក្បែរៗនោះ ។ នៅក្នុងរយៈពេលជាង១ឆ្នាំនេះកំពែង អង្គរធំភាគឦសានដែលបានជួសជុល ហើយនោះមានប្រវែង៨ម៉ែត្រនិងកម្ពស់៧ម៉ែត្រកន្លះ ។
លោកបណ្ឌិត លី វណ្ណា ប្រធាននាយក ដ្ឋានអភិរក្សប្រាសាទក្នុងឧទ្យានអង្គរ និង បុរាណវិទ្យាបង្ការបានឱ្យដឹងថា តាម ពិតទៅកំពែងអង្គរធំមានប្រវែងព័ទ្ធជុំវិញសរុប១២គីឡូម៉ែត្រ ។ ក្នុងប្រវែងទាំងអស់ នោះមានការដួលរលំជាង២០កន្លែង ដោយសារខ្យល់ព្យុះកេតសាណាផងបូក រួមទាំងកត្ដាផ្សេងៗទៀតដូចជាការពុក ផុយនៃថ្ម ការរំកិលនៃថ្ម ដីកណ្ដៀរ និង ការដួលរលំនៃដើមឈើដែលដុះពីលើជាដើម ។ បច្ចុប្បន្នក្រុមជំនាញបានធ្វើផែនទី ហានិភ័យមួយដែលបានបញ្ជាក់អំពីចំណុចពុកផុយនិងចំណុចដួលរលំទាំងជាង២០ កន្លែងនោះហើយ ។
លោក លី វណ្ណា បានឱ្យដឹងទៀតថា កំពែងអង្គរធំទាំងមូលមានចំណុចដួល រលំចំនួន៤ផ្ទាំងធំៗដែលក្នុងនោះ១ផ្ទាំងមានប្រវែង៨ម៉ែត្រនិងកម្ពស់៧ម៉ែត្រ កន្លះនោះបានជួសជុលរួចហើយ ។ ចំណែក ៣ផ្ទាំងទៀតក៏បានចាប់ផ្ដើមដំណើរការ ជួសជុលដែរដែលតាមការគ្រោងទុកនឹងឱ្យរួចរាល់នៅពាក់កណ្ដាលឆ្នាំក្រោយ ។
លោកបានបញ្ជាក់ថា ការងារជួស ជុលកំពែងទាំង៤កន្លែងនេះមានអ្នកជំនាញខ្មែរ៤រូប ក្នុងនោះអ្នកបុរាណវិទ្យា៣រូប និងស្ថាបត្យករ១រូបរួមនឹងកម្មករ៧០ នាក់ ។ ចំពោះបច្ចេកទេសនៃការជួសជុល នេះ បើទោះជាយើងមានអ្នកជំនាញខ្មែរ កាន់ការដោយខ្លួនឯងក៏ពិតមែនតែយើងតែងឆ្លងរបាយការណ៍និងពិគ្រោះយោបល់ជាមួយគណៈកម្មាធិការអាយស៊ីស៊ី-អង្គរ ជាប្រចាំផងដែរជាពិសេសក្នុងកិច្ចប្រជុំបច្ចេកទេសនិងកិច្ចប្រជុំពេញអង្គរបស់ គណៈកម្មាធិការនេះ ៕
ដោយ៖ ហេង នរិន្ទ្រ
