ភ្នំពេញ: បុរសវ័យចំណាស់ម្នាក់សង្ស័យខ្យល់គបានសា្លប់នៅលើផ្ទះរបស់ខ្លួន ស្ថិតក្នុងភូមិត្រពាំងអារក្ស សង្កាត់ឪឡោក ខណ្ឌពោធិ៍សែនជ័យ បន្ទាប់ពីផឹកស្រវឹងដេកអត់បាយ១យប់១ថ្ងៃ បង្កការភា្ញក់ផ្អើលកាលពីវេលាម៉ោង៣និង៣០នាទីរសៀល ថ្ងៃទី២៤ ខែធ្នូ២០១៥។
មន្រី្តនគរបាលប៉ុស្តិ៍ឪឡោកបានឲ្យដឹងថា ជនរងគ្រោះជាសាកសពឈ្មោះសន គក់ភេទប្រុស អាយុ៥០ឆ្នាំ មុខរបរកសិករ រស់នៅភូមិកើតហេតុខាងលើ ។
ស្រ្តីឈ្មោះសន សំឡូត អាយុ២៧ឆ្នាំ មុខរបរមេផ្ទះជាកូនបង្កើតជនរងគ្រោះបានឲ្យដឹងថា គាត់ទើបនឹងសម្រាលកូនរួចសម្រាកនៅខាងក្រោមផ្ទះ មិនដឹងថាឪពុកដេកសា្លប់នៅលើផ្ទះតាំងពីពេលណាទេដោយគ្រាន់តែដឹងថានៅយប់ថ្ងៃទី២៣ខែធ្នូឆ្នាំ២០១៥ឪពុករបស់ខ្លួន មកពីហូបស្រាស្រវឹងដែលបាតជិតមួយថ្ងៃមិនមកហូបបាយបានឡើងទៅសម្រាកនៅលើផ្ទះតែម្នាក់ឯង។លុះវេលាព្រឹកឡើងថ្ងៃទី២៤ធ្នូឆ្នាំ២០១៥ មិនឃើញឪពុកក្រោកពីដំណេកទៅធ្វើការដូចសព្វដងគាត់ឡើងទៅដាស់ ក៏ស្រាប់តែឃើញឪពុកកំពុងដេកដកចង្ការមាន់ឮសូរខុលៗ គាត់បានជួយរឹតទ្រូងនិងស្រែកហៅអ្នកជិតខាងមកជួយមើល តែជាអកុសលក្រោយមកឪពុករបស់គាត់ បានដាច់ខ្យល់ទៅធ្វើឲ្យគាត់យំសោកស្តាយឪពុកខ្លាំងណាស់ ។
បន្ទាប់មកទើបសមត្ថកិច្ចនគរបាលជំនាញចុះទៅត្រួតពិនិត្យនិងធ្វើកោសល្យវិច័យហើយសមត្ថកិច្ចអះអាងថា បុរសជនរងគ្រោះរូបនោះ ពឹតជាស្លាប់ដោយសារខ្យល់គរផឹកស្រា មិនហូបបាយទើបប្រគល់សពឱ្យក្រុមគ្រួសារ យកទៅបុណ្យតាម ប្រពៃណីនៅនិងផ្ទះរបស់ខ្លួននោះតែម្តងទៅ ៕
ដោយ៖ ប្រាថ្នា
