ហេតុការណ៍ផ្ទុះមួយបានកើតឡើងបណ្តាលឲ្យមនុស្សយ៉ាងតិច១០នាក់បាត់បង់ជីវិត ។ ខុទ្ទកាល័យប្រធានាធិបតីនីហ្សេរីយ៉ាបានបញ្ជាក់កាលពីថ្ងៃទី២៥ ខែធ្នូ ឆ្នាំ២០១៥ថា ហេតុការណ៍ផ្ទុះនេះបានកើតឡើងនៅរោងចក្រឧស្ម័នមួយកន្លែងភាគខាងត្បូងប្រទេស។ សារព័ត៌មានក្នុងស្រុកបានរាយការណ៍ថា ហេតុការណ៍នេះបណ្តាលឲ្យមនុស្សស្លាប់កើនឡើងខ្ទង់១០០នាក់ ។
ប្រភពពីសាក្សីឃើញហេតុការណ៍បាននិយាយថា ហេតុការណ៍ផ្ទុះបានកើតឡើងកាលពីថ្ងៃទីបុណ្យគ្រីស្ទមាស់ នៅពេលរថយន្តមួយគ្រឿងបានចូលចាក់ប្រេងទីនោះ ដែលស្ថិតនៅក្នុងទីប្រជុំជន Nnewi រដ្ឋ Anambra និងស្របពេលដែលមនុស្សម្នាច្រើននាក់កំពុងកកកុញចាក់ប្រេងអំឡុងពេលបុណ្យគ្រឹស្ទមាស់នោះផងដែរ ។
ខុទ្ទកាល័យប្រធានាធិបតី Muhammadu Buhari បានប្រកាសថា មនុស្ស១០នាក់បានបាត់បង់ជីវិតក្នុងហេតុការណ៍នេះ ។ ប្រភពមិនបានលាតត្រដាងព័ត៌មានលម្អិតជាងនេះឡើយ ។
ប៉ុន្តែទោះបីយ៉ាងណា អ្នកកាសែតក្នុងតំបន់ម្នាក់ដែលស្ថិតនៅក្នុងហេតុការណ៍ខាងលើដែរនោះ ឈ្មោះ David Onwuchekwa បានអះអាងថា លោកបានឃើញសាកសពប្រមាណ១០០នាក់ ។ លោកបន្តថា ជនរងគ្រោះដែលបាត់បង់ជីវិតភាគច្រើនជាអ្នកដែលទៅចាក់ប្រេងនៅទីនោះ និងអ្នកដែលមានលំនៅឋានក្បែរកន្លែងកើតហេតុ ។
មនុស្សជាច្រើននាក់ស្ថិតនៅក្នុងអគារ មានដូចជាកម្មករធ្វើឲ្យរោងចក្រឧស្ម័ននោះ ព្រមទាំងមនុស្សដែលទៅកាន់ទីនោះដើម្បីទិញហ្គាសក៏រងគ្រោះដោយសារហេតុការណ៍នេះផងដែរ ។
ជាមួយគ្នានេះដែរ មនុស្សជាច្រើននាក់ផ្សេងទៀតត្រូវបញ្ជូនទៅកាន់មន្ទីរពេទ្យដើម្បីសម្រាកព្យាបាល ។
សាក្សីម្នាក់បានប្រាប់បណ្តាញទូរទស្សន៍ក្នុងស្រុកមួយថា ខ្ញុំបានឃើញអណ្តាតភ្លើង ប៉ុន្តែខ្ញុំមិនដឹងថាមានរឿងអ្វីកើតឡើងនោះឡើយ ។ ខ្ញុំបានបានចាប់ផ្តើមរត់ ហើយបន្ទាប់មកខ្ញុំបានឮសំឡេងផ្ទុះតែម្តង ៕
ប្រែសម្រួល៖ ថាច់ យ៉ាត
