ខេត្តស្វាយរៀង៖ បុរសម្នាក់ស្រវឹងស្រាជោកជាំ ហើយដើរដួលចូលក្នុងទឹកស្រែប្រាំង ងើបមុខពីក្នុងទឹកមិនរួចបណ្តាលឲ្យលង់ស្លាប់កាលពីរវេលាម៉ោង៤រសៀល ថ្ងៃទី២៦ ខែធ្នូ ឆ្នាំ២០១៥ ស្ថិតនៅភូមិរាមសេនា ឃុំអណ្តូងពោធិ៍ ស្រុករមាសហែក ខេត្តស្វាយរៀង ។
បើតាមសមត្ថកិច្ចបានឲ្យដឹងថា ជនរងគ្រោះឈ្មោះ មាស ហ៊ន ភេទប្រុស អាយុ៤៧ឆ្នាំ រស់នៅក្នុងភូមិកើតហេតុខាងលើផឹកស្រាស្រវឹងជោកជាំរួចដើរចេញពីផ្ទះចម្ងាយ៦០ម៉ែត្រ ក៏ដួលផ្កាប់មុខទៅក្នុងទឹកស្រែប្រាំងជម្រៅត្រឹមកំភូនជើងគ្មានអ្នកណាឃើញបណ្តាលឲ្យលង់ស្លាប់យ៉ាងអាណោចអាធ័ម។
ប្រភពដដែលបន្តទៀតថា មានអ្នកភូមិម្នាក់បានដើរមកតាមភ្លឺស្រែប្រទះ ឃើញជនរងគ្រោះដួលដេកផ្កាប់មុខទៅក្នុងទឹកស្រែប្រាំងក៏ស្រែកឆោឡោផ្អើលដល់អ្នកស្រុកនាំគ្នាមកមើលដំបូងសង្ស័យថា ជាអំពើឃាតកម្ម ក៏ប្តឹងសមត្ថកិច្ចឲ្យមកពិនិត្យសពជនរងគ្រោះ។
ក្រោយពីពិនិត្យសពរួចមកមិនឃើញមានស្លាកស្នាមជាអំពើឃាតកម្មគឺសន្និដ្ឋានថា ជនរងគ្រោះស្រវឹងស្រាជោកជាំហើយបានដើរចេញពីផ្ទះទៅវាលស្រែហើយក៏ដួលធ្លាក់ចូលក្នុងស្រែកផ្កាប់មុខក្នុងទឹកងើបមិនរួចបណ្តាលឲ្យឈ្លក់ទឹកស្លាប់តែម្តង ។ ម្យ៉ាងទៀត ជនរងគ្រោះធ្លាប់មានប្រវត្តិជំងឺតេតាណុះប្រកាច់ធ្លាក់ចូលទឹក ងើបមិនរួចបណ្តាលឲ្យស្លាប់។
ក្រោយពីពិនិត្យសពរួច សមត្ថកិច្ចប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ យឹម សុថាន
