ខេត្តកំពង់ឆ្នាំង៖ ជនសង្ស័យម្នាក់ ជាអ្នកចែកចាយ និង ជួញដូរ គ្រឿងញៀនដ៏សកម្ម ត្រូវបានសមត្ថកិច្ច នគរបាលក្រុងកំពង់ឆ្នាំង សហការជាមួយនគរប្រឆាំងបទ ល្មើសគ្រឿងញៀន សហការគ្នាព័ទ្ធចាប់បានក្នុងពេលដែលជនសង្ស័យរូបនេះបានធ្វើ សកម្មភាព។
ហេតុការណ៍នេះ ចាប់ជនសង្ស័យអ្នកចែកចាយគ្រឿងញៀននេះធ្វើឡើងនៅម៉ោង១១និង៣០នាទីព្រឹក ថ្ងៃទី២៧ ខែធ្នូ ឆ្នាំ២០១៥ នៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចនគរបាលបានអោយដឹងថា ជនសង្ស័យមានឈ្មោះ វ័ន្ត ហៃ អាយុ៤៣ឆ្នាំ រស់នៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ជាមុខសញ្ញាជួញដូរនិងចែកចាយលក់ដូរថ្នាំញៀន។
ក្នុងពេលឃាត់ខ្លួនសមត្ថកិច្ចបាន ដកហូតបានថ្នាំញៀនប្រភេទម៉ាទឹកកកបាន១កញ្ចប់ធំនិង២កញ្ចប់តូចកាំបិតចុងស្រួចមួយសំភារៈសំរាប់ច្រកនិងឧបរណ៍ជក់ថ្នាំញៀនមួយចំនួនទៀត។មុនពេលចាប់ខ្លួនរូបគេកំពុងធ្វើសកម្មភាពជួញដូរថ្នាំញៀននៅក្នុងលំនៅដ្ឋាន ហើយសមត្ថកិច្ចនគរបាលក្រុងកំពង់ឆ្នាំងនិងនគរបាលប្រឆាំងគ្រឿងញៀនខេត្ត បានសហការគ្នាឡោមព័ទ្ធចាប់ខ្លួនបានតែម្តង ។
សមត្ថកិច្ចបានអោយដឹងថា ជនសង្ស័យគឺជាមុខសញ្ញាចាស់ ដែលសមត្ថកិច្ច មូលដ្ឋាន និង សមត្ថកិច្ចខេត្តធ្វើការតាមដានអំពីសកម្មភាពរបស់ជនសង្ស័យ ក្រោយពី ទទួលព័ត៌មានថាជនសង្ស័យបានរៀបចំធ្វើសកម្មភាពនោះសមត្ថកិច្ចបានធ្វើការឡោមព័ទ្ធចាប់តែម្តង ។
នៅពេលនេះសមត្ថកិច្ចកំពុងកសាងសំណុំរឿងបញ្ជូនទៅតុលាការដើម្បីចាត់ការបន្តតាមនីតិវិធីច្បាប់ ៕
ដោយ៖ ចន្ថា
