ខេត្តពោធិ៍សាត់៖ កម្លាំងមូលដ្ឋានកងរាជអាវុធហត្ថស្រុកតាលោសែនជ័យ និងនគរបាលប៉ុស្តិ៍ ឃាត់ចាប់ការដឹកជញ្ជូនបំណែកដែករថយន្តកែច្នៃ(បាកុង) ដែលកម្លាំងការពារធនធានធម្មជាតិកងរាជអាវុធហត្ថធ្វើការបង្រ្កាបនាពេលកន្លងមក ។
ប្រតិបត្តិការឃាត់ចាប់អ្នកបើកម៉ូតូសណ្ដោងរឺម៉កខាងលើនេះ ធ្វើឡើងនៅវេលាម៉ោង៣ និង៣០នាទី រសៀលថ្ងៃសៅរ៍ ១រោច ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៤ ខែកញ្ញា ឆ្នាំ២០១៩ នៅលើកំណាត់ផ្លូវថ្នល់កៅស៊ូ ស្ថិតក្នុងព្រៃរោង ឃុំតាលោ ស្រុកតាលោសែនជ័យ ខេត្តពោធិ៍សាត់ ។
លោក វរសេនីយ៍ត្រី ហួត វ៉ាន់ មេបញ្ជាការមូលដ្ឋានកងរាជអាវុុធហត្ថស្រុកតាលោសែនជ័យប្រាប់ថា ម្ចាស់ម៉ូតូសណ្ដោងរឺម៉កដឹកជញ្ជូនកំណាត់ដែក ដែលជាបំណែករថយន្តកែច្នៃ(បាកុង)ឈ្មោះ សុន សុីថា ភេទប្រុស អាយុ ២៣ឆ្នាំ ជនជាតិខ្មែរ បច្ចុប្បន្ន រស់នៅភូមិព្រៃតោ ឃុំតាលោ ស្រុកតាលោសែនជ័យ ខេត្តពោធិ៍សាត់ គាត់ដឹកចេញមកពីភូមិសាស្រ្តនៃស្រុកវាលវែង ខេត្តពោធិ៍សាត់ ដែលកំណាត់ដែកនេះជាបំណែករថយន្តកែច្នៃ(បាកុង) ដែលកម្លាំងសហការធ្វើការបង្រ្កាបនាកន្លែងមក ខណៈគេរកឃើញជាមធ្យោបាយបំរើបទល្មើសព្រៃឈើ ។
លោក មេបញ្ជាការមូលដ្ឋានបន្តទៀតថា បំណែកដែករថយន្តមានចំនួន ១៣កំណាត់ ស្មើនឹង១០៨០គីឡូក្រាម ជនសង្ស័យម្ចាស់ម៉ូតូសណ្ដោងរឺម៉កធ្វើការអប់រំ និងប្រគល់មធ្យោបាយដឹកជញ្ជូន(ម៉ូតូសណ្ដោងរឺម៉ក)វិញ ដោយមានការសម្របសម្រួលពីលោក តន់ សីហតេជ ព្រះរាជអាជ្ញាអមសាលាដំបូងខេត្តពោធិ៍សាត់ ចំណែកកំណាត់ដែកជាបំណែករថយន្តកែច្នៃ(បាកុង) រក្សាទុកជាបណ្ដោះអាសន្ន នៅមូលដ្ឋានកងរាជអាវុធហត្ថស្រុកតាលោសែនជ័យ ៕
ដោយ៖ បុឹម ពិន
