ភ្នំពេញ ៖ ស្ពានបេឡេឫស្សីកែវដំណើរការឡើងវិញបាន ចាប់ពីវេលាម៉ោង ៧:០០ព្រឹក ថ្ងៃទី១៦ ខែកញ្ញា ឆ្នាំ២០១៩នេះ ក្រោយប្រកាសផ្អាកចរាចរណ៍ជាបណ្តោះអាសន្ននេះ ដោយសារតែអ្នកបើកបរសាឡង់ដឹកប្រេងមួយគ្រឿង បុកប៉ះកាលពីវេលា ម៉ោង១៥៖០១រសៀល ថ្ងៃទី១០ ខែកញ្ញា ឆ្នាំ២០១៩កន្លងទៅនេះ ។
ដំណេីរការថែរក្សានិងជួសជុលដោយការខិតខំប្រឹងប្រែងរបស់វិស្វករ និងបងប្អូនកម្មករការដ្ឋាន ។ មកដល់ពេលនេះ ការជួសជុលស្ពានបេឡេឡើងវិញបានបញ្ចប់រួចរាល់ហើយ ។
សូមអញ្ជើញបងប្អូនប្រជាពលរដ្ឋធ្វើដំណើរឆ្លងកាត់ស្ពានបេឡេប្រកបដោយសេចក្តីរីករាយក្នុងឱកាសបុណ្យភ្ជុំបិណ្ឌ ហើយ សង្ឃឹមថា ស្ពានជ្រោយចង្វារដែលកកស្ទះប៉ុន្មានថ្ងៃមកនេះ នឹងកាត់បន្ថយការកកស្ទះចរាចរ វិលមកប្រក្រតីឡើងវិញ ។
ស្ពានបាឡេឬស្សីកែវនេះ ឆ្លងកាត់ទន្លេសាប ពីចំណុចឃ្លាំងស្តុកប្រេងសូគីម៉ិច ផ្លូវជាតិលេខ៥ ក្នុងខណ្ឌឫស្សីកែវ ឆ្ពោះមកកាន់តំបន់អភិវឌ្ឍន៍ ទីក្រុងរណបខណ្ឌជ្រោយចង្វា ត្រូវបានបើកសម្ពោធដាក់ឲ្យចរាចរណ៍ជាផ្លូវការ កាលពីរសៀលថ្ងៃទី០៨ ខែឧសភា ឆ្នាំ២០១៨ ក្រោយពីបានដំណើរការសាង សង់ អស់រយៈពេល៦ខែ កន្លងមកនេះ៕
