ខេត្តស្វាយរៀង៖ ប្រុសស្រី២នាក់រងរបួសធ្ងន់ដោយសារករណីគ្រោះថ្នាក់ចរាចរណ៏រវាងម៉ូតូបើកស្របទិសគ្នានៅលើផ្លូវជាតិលេខ១ កាលពីវេលាម៉ោង៩យប់ថ្ងៃទី២៨ ខែធ្នូ ឆ្នាំ២០១៥ ត្រង់ចំណុចភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង ។
សមត្ថកិច្ចនគរបាលក្រុងបាវិតបានអោយដឹងថា នារីរងគ្រោះមានឈ្មោះអឹុម រ៉ាឌី ភេទស្រី អាយុ២៣ឆ្នាំ មុខរបរកម្មការិនីរោងចក្រ រស់នៅភូមិព្រៃផ្ដៅ សង្កាត់ច្រកម្ទេស ក្រុងបាវិត ខេត្តស្វាយរៀង បើកបរពីលិចទៅកើត បើកបរម៉ូតូ ម៉ាកហុងដាវ៉េវ ពាក់ស្លាកលេខវៀតណាម៧០-K៨-៧៣៥២ ខូចខាតយ៉ាងដំណំ ។
ប្រភពបន្តថា មុនពេលកើតហេតុមានម៉ូតូ១គ្រឿង ម៉ាកហុងដា សេ១២៥ ពាក់ស្លាកលេខស្វាយរៀង1C-9603 បើកបរដោយឈ្មោះឡេង សំណាង ភេទប្រុស អាយុ២១ឆ្នាំ មុខរបរកម្មកររោងចក្រ រស់នៅភូមិអូរតាមោ ឃុំមនោរម្យ ស្រុកស្វាយទាបបានធ្វើដំណើរពីលិចទៅកើតលើកំណាត់ផ្លូវជាតិលេខ១ក្នុងល្បឿនលឿនដោយមិនប្រយ័ត្ន ក៏ជ្រុលចង្កូតទៅបុកពីក្រោយម៉ូតូវ៉េវបើកបរដោយស្ត្រីម្នាក់យ៉ាងពេញទំហឹងបណ្ដាលអោយដួលសន្លប់ស្ដូកស្ដឹងទាំងសងខាង ។
ក្រោយមកប្រជាពលរដ្ឋក៏បានរាយការណ៏មកសមត្ថកិច្ចប៉ុស្តិ៍រដ្ឋបាលដើម្បីជួយសង្គ្រោះដឹកយកមកព្យាបាលនៅមន្ទីរពេទ្យបង្អែកខេត្តស្វាយរៀង ។ រីឯវត្ថុតាងម៉ូតូទាំង២គ្រឿងត្រូវបានរក្សាទុកនៅអធិការដ្ឋាននគរបាលក្រុងបាវិត ដើម្បីដោះស្រាយតាមច្បាប់ ។
មូលហេតុមកពីអ្នកបើកបរម៉ូតូម៉ាកហុងដា សេ១២៥ ប្រើប្រាស់ល្បឿនលឿនខ្វះការប្រុងប្រយ័ត្នទើបជួបគ្រោះថ្នាក់ចរាចរណ៏នេះកើតឡើង ៕
...
