ប្រទេសអង់គ្លេស៖ តុលាការកំពូល របស់ប្រទេសអង់គ្លេស បានប្រកាសថា៖ នាយករដ្ឋមន្ត្រី Boris Johnson មានសកម្មភាពនយោបាយផ្ទុយទៅនិងច្បាប់ ក្រោយពេលលោកប្រឹក្សា ស្នើឲ្យព្រះមហាក្សត្រី ផ្អាកដំណើរការសភា មុនប៉ុន្មានសប្តាហ៍ដែលសម្រេច Brexit ហើយ ការសម្រេច ផ្អាកសភា មិនមានប្រសិទ្ធិភាព។
កាលពីថ្ងៃទី២៤ ខែកញ្ញា តុលាការកំពូលបានសម្រេចជាឯកច្ឆន្ទថា ការព្យួរសភារយៈពេល ៥សប្តាហ៍របស់លោកនាយករដ្ឋមន្រ្តីបូរីស ចនសុន ជារឿងខុសច្បាប់។ សម្រាប់តុលាការកំពូល សភាអង់គ្លេសមិនត្រូវបានព្យួរទេ តែរឿងការសម្រេចឲ្យមានការកោះប្រជុំសភាឡើងវិញនៅពេលណានោះ វាអាស្រ័យលើការសម្រេចរបស់ប្រធានសភា។ ចំណាត់ការរបស់តុលាការកំពូលពេលនេះដូចគ្នានិងការសម្រេចរបស់តុលាការស្កុតឡែនកាលពីថ្ងៃទី១១ កញ្ញា។ ក្រុមប្រឆាំងបានចាត់ទុកទង្វើរបស់លោកចនសុនថា មានគោលដៅរុញអង់គ្លេសឲ្យចេញពីអឺរ៉ុបដូចការគ្រោងទុក ទោះមាន ឬគ្មានកិច្ចព្រមព្រៀង។
គឺជារឿងអាម៉ាស់មុខថ្មីមួយទៀតសម្រាប់លោកបូរីស ចនសុនដែលនៅទីបំផុត ចៅក្រមទាំង ១១រូបនៃតុលាការកំពូលបានសម្រេចជាឯកច្ឆន្ទថា ការសម្រេចព្យួរសភារបស់លោកចនសុនរយៈពេល ៥សប្តាហ៍ពីថ្ងៃទី៩ កញ្ញាដល់ថ្ងៃទី១៤ តុលា ពោល២សប្តាហ៍មុនអង់គ្លេសចេញពីអឺរ៉ុបនៅថ្ងៃទី៣១ តុលាការជារឿងខុសច្បាប់។ អ្វីដែលតុលាការកំពូលបានសម្រេចពេលនេះ គឺដូចគ្នានិងការសម្រេចរបស់តុលាការស្កុតឡែនកាលពីថ្ងៃទី១១ កញ្ញា។ ដូច្នេះ នេះជាជោគជ័យថ្មីមួយទៀតសម្រាប់ក្រុមប្រឆាំង ពិសេសក្រុមអ្នកតំណាងរាស្រ្តអង់គ្លេសដែលគាំទ្រអឺរ៉ុបដោយពួកគេមិនចង់ឃើញអង់គ្លេសចេញពីអឺរ៉ុបនៅថ្ងៃទី៣១ តុលាខាងមុខដោយគ្មានកិច្ចព្រមព្រៀងឡើយ។
គឺខុសពីលោកចនសុនដែលចង់ឃើញអង់គ្លេសចេញពីអឺរ៉ុបនៅថ្ងៃទី៣១ តុលា ទោះមាន ឬមិនមានកិច្ចព្រមព្រៀងក្តី។ ក្រុមប្រឆាំងបានមើលឃើញថា ទង្វើព្យួរសភារបស់លោកចនសុនរហូតដល់គៀកថ្ងៃដែលអង់គ្លេសត្រូវចេញពីអឺរ៉ុបជាល្បិចកលនយោបាយ និងមានគោលដៅរុញអង់គ្លេសឲ្យចេញពីអឺរ៉ុបដូចបានគ្រោងទុក ទោះមាន ឬគ្មានកិច្ចព្រមព្រៀង។ ទន្ទឹមនឹងចាត់ទុកការសម្រេចព្យួរសភារបស់លោកចនសុនជារឿងខុសច្បាប់ តុលាការកំពូលក៏បានបញ្ជាក់ថា សភាមិនត្រូវបានព្យួរទេ ហើយរឿងកោះប្រជុំសភានៅពេលណានោះជាតួនាទីរបស់ប្រធានសភា។ ប្រតិកម្មភ្លាមៗ ប្រធានសភាលោកចន បឺខូវបានបញ្ជាក់ថា លោកត្រូវកោះប្រជុំសភាឆាប់ៗដោយមិនបង្អង់យូរ និងថា លោកនឹងទៅពិភាក្សាជាមួយប្រធានគណបក្សគ្រប់រូបជាបន្ទាន់។
ចំណែកលោក Jeremy Corbyn ប្រធានគណបក្សពលករដែលជាបក្សប្រឆាំងបានទាមទារឲ្យលោកបូរីស ចនសុនចុះចេញពីតំណែង៕
ដោយ៖ មែវ សាធី
