ជំនួយការជាន់ខ្ពស់ម្នាក់របស់មេដឹកនាំកូរ៉េខាងជើង គីម ជុងអ៊ុន បានបាត់បង់ជីវិតនៅក្នុងហេតុការណ៍គ្រោះថ្នាក់ចរាចរណ៍ ។ នេះបើតាមការផ្សព្វផ្សាយរបស់ទីភ្នាក់ងារព័ត៌មាន KCNA របស់កូរ៉េខាងជើង ។
ប្រភពបានផ្សព្វផ្សាយកាលពីថ្ងៃទី៣០ ខែធ្នូ ឆ្នាំ២០១៥ថា លោក Kim Yang-gon អាយុ៧៣ឆ្នាំ ជាលេខាធិការបក្សពលករកូរ៉េខាងជើង និងជាអ្នកទទួលបន្ទុកកិច្ចការទំនាក់ទំនងជាមួយកូរ៉េខាងត្បូងនោះបានបាត់បង់ជីវិត ក្នុងហេតុការណ៍បើករថយន្តជួបគ្រោះថ្នាក់ចរាចរណ៍ ។
លោក Kim Yang-gon ជាបុគ្គលមួយរូបស្ថិតក្នុងចំណោមប្រតិភូជាន់ខ្ពស់កូរ៉េខាងជើងដែលខិតខំបញ្ចៀសការប្រឈមមុខតានតឹងដាក់គ្នាជាមួយកូរ៉េខាងត្បូងកាលពីខែសីហា ឆ្នាំ២០១៥ បន្ទាប់ពីមានការផ្ទុះអាវុធដាក់គ្នាមួយប្រ៉ាវឆ្លងកាត់តាមបន្ទាត់ព្រំដែនរវាងកូរ៉េទាំងពីររួចមកនោះ ។
បណ្តាញព័ត៌មានកូរ៉េខាងជើង KCNA បានពិព័រណ៍នាចាត់ទុក លោក Kim Yang-gon ថា ជាសមមិត្តជិតស្និទ្ធបំផុត របស់មេដឹកនាំគីម ជុងអ៊ុន និងជាដៃគូបដិវត្តន៍ដ៏មោះមុតមួយរូបផងដែរ ។ លោក Kim Yang-gon ជាអគ្គលេខាធិការគណបក្សពលករកូរ៉េខាងជើង និងជាសមាជិកគណៈកម្មការកណ្តាលរបស់បក្សផងដែរ ។ លោកបានទទួលមរណភាពកាលពីវេលាម៉ោង៦និង១៥នាទីព្រឹក ថ្ងៃទី២៩ ខែធ្នូ ឆ្នាំ២០១៥ ។
មេដឹកនាំគីម ជុងអ៊ុន ដឹកនាំសមាជិករដ្ឋាភិបាលទាំង៨០រូបផ្សេងទៀតចូលរួមពិធីបុណ្យសពលោក Kim Yang-gon ផងដែរនៅថ្ងៃទី៣០ ខែធ្នូ ឆ្នាំ២០១៥ ។
ស្ថានការណ៍តានតឹងរវាងកូរ៉េខាងជើង នឹងខាងត្បូងបានឈានដល់កម្រិតកំពូលកាលពីខែសីហា ឆ្នាំ២០១៥ នៅពេលដែលមានការផ្ទុះគ្រាប់មីននៅបន្ទាត់ព្រំដែនបណ្តាលឲ្យទាហានកូរ៉េខាងត្បូង២នាក់រងរបួសនោះ ។
កិច្ចប្រជុំនាអំឡុងពេលនោះបានប្រែក្លាយឲ្យប្រទេសទាំងពីរបញ្ឈប់ការប្រឈមមុខតានតឹងដោយកងកម្លាំងយោធាដាក់គ្នា ៕
ប្រែសម្រួល៖ ថាច់ យ៉ាត
