ប៉ូលិសប៉ាគីស្ថានបានថ្លែងថា ជនសង្ស័យម្នាក់បានវាយប្រហារគ្រាប់បែកអត្តឃាតនៅក្នុងការិយាល័យធ្វើការរបស់រដ្ឋាភិបាលប៉ាគីស្ថានមួយកន្លែង ស្ថិតនៅភាគពាយព្យប៉ាគីស្ថានបណ្តាលឲ្យមនុស្សយ៉ាងតិច២៦នាក់បាត់បង់ជីវិត ។
ហេតុការណ៍វាយប្រហារនេះបានកើតឡើងនៅខាងក្រៅទីស្នាក់ Nadra ស្ថិតនៅក្នុងទីប្រជុំជន Mardan ។ ក្រុមខ្មាន់កាំភ្លើងរបស់ក្រុមឧទ្ទាមតាលីបង់បានអះអាងថា ការវាយប្រហារនេះជាទង្វើរបស់ក្រុមខ្លួន ។ ការវាយប្រហារនេះក្រៅពីបណ្តាលឲ្យមានអ្នកស្លាប់ នៅមានមនុស្ស៤៥នាក់ផ្សេងទៀតរងរបួស ។
នេះជាការវាយប្រហារសម្លាប់រង្គាលបំផុត ចាប់តាំងពីធ្នូ ឆ្នាំ២០១៤មក ដែលការវាយប្រហារសម្លាប់រង្គាលបណ្តាលឲ្យមនុស្ស១៥០នាក់ ភាគច្រើន ជាសិស្សសាលា និងគ្រូ ស្ថិតនៅទីក្រុង Peshawar នោះ ។
ប្រភពព័ត៌មានប៊ីប៊ីស៊ីបានផ្សព្វផ្សាយកាលពីថ្ងៃទី៣០ ខែធ្នូ ឆ្នាំ២០១៥ថា ជនវាយប្រហារបានធ្វើដំណើរដោយម៉ូតូមួយគ្រឿង ហើយបំផ្ទុះគ្រាប់បែកធ្វើអត្តឃាត នៅពេលដែលកងកម្លាំងសន្តិសុខដែលយាមកាមនៅខាងក្រៅការិយាល័យ Nadra នោះបានឃាត់ឲ្យឈប់ ។
ការិយាល័យ Nadra នេះជានិច្ចកាលតែងតែកកកុញទៅដោយមនុស្ស ដោយសារតែពលរដ្ឋទៅកាន់ទីនោះដើម្បីយកអត្តសញ្ញាណប័ណ្ណរបស់ខ្លួន ។ រហូតមកដល់ពេលនេះ អាជ្ញាធរបានបញ្ជាក់ថា ជនរងគ្រោះរហូតបាត់បង់ជីវិតក្នុងហេតុការណ៍បំផ្ទុះគ្រាប់បែកអត្តឃាតខាងលើនេះបានកើនដល់២៦នាក់ ហើយភាគច្រើនក្នុងចំណោមជនរងគ្រោះដែលបាត់បង់ជីវិត និងរងរបួស គឺជាពលរដ្ឋស៊ីវិល ។
ទីភ្នាក់ងាររ៉យទ័របានផ្សព្វផ្សាយថា ស្ថិតនៅក្នុងមន្ទីរពេទ្យ Bacha Khan បានទទួលសាកសព១៦នាក់ និងច្រើននាក់ផ្សេងទៀតរងរបួស ។
លោក Saeed Wazir អនុប្រធានក្រុមស៊ើបអង្កេតនៃស្នងការប៉ូលិសក្រុង Mardan នោះបានបញ្ជាក់ថា ប្រសិនបើកងកម្លាំងសន្តិសុខមិនបានបញ្ឈប់ជនវាយប្រហារគ្រាប់បែកអត្តឃាតនៅខាងក្រៅរបងនោះទេ ជនរងគ្រោះដែលបាត់បង់ជីវិត និងអ្នករងរបួស អាចនឹងកើនឡើងច្រើនជាងយ៉ាងពិតប្រាកដ ។ លោកបន្តថា គ្រឿងផ្ទុះមានទម្ងន់រហូតដល់១២គីឡូត្រូវបានប្រើប្រាស់ក្នុងការបំផ្ទុះនេះ ។
ក្រុម Jamaat-e-Ahrar ដែលបំបែកខ្លួនចេញពីក្រុមឧទ្ទាមតាលីបង់ប៉ាគីស្ថានក្នុងឆ្នាំ២០១៤នោះបានអះអាងថា ខ្លួនជាអ្នកវាយប្រហារអត្តឃាតខាងលើនេះ ដោយសារក្រុមទាំងនោះមិនបានជឿមកលើសាសនានៅប៉ាគីស្ថាន ។
ក្រុមភេរវកម្ម Jamaat-e-Ahrar ក៏ដូចជាក្រុមដទៃផ្សេងទៀតផងដែរបានប្រកាសទទួលស្គាល់ការបំផ្ទុះគ្រាប់បែកមួយបណ្តាលឲ្យមនុស្សយ៉ាងតិច៥០នាក់បាត់បង់ជីវិត ស្ថិតនៅបន្ទាត់ព្រំដែន Wagah ឆ្លងកាន់ចេញ ចូលទៅកាន់ឥណ្ឌានោះកាលពីឆ្នាំ២០១៤ ។
អ្នកនាំពាក្យក្រុមឧទ្ទាម Tehrik-e Taliban Pakistan (TTP) លោក Khurasani បានប្រកាសថា គោលជំហររបស់ក្រុមខ្លួនមិនគាំទ្រដល់សកម្មភាពវាយប្រហារនៅតាមទីសាធារណៈនោះឡើយ ។ ក្រុមឧទ្ទាម Tehrik-e Taliban Pakistan (TTP) ជាក្រុមភេរវកម្មដែលមានឥទ្ធិពលបំផុតនៅប៉ាគីស្ថាន ។ ប៉ុន្តែទោះបីយ៉ាងណា កាលពីពេលកន្លងមកថ្មីៗនេះ ក្រុមឧទ្ទាម Tehrik-e Taliban Pakistan (TTP)បានប្រកាសទទួលស្គាល់ការវាយប្រហារជាច្រើនលើកទៅលើគោលដៅជនស៊ីវិល ក្នុងនោះមានការវាយប្រហារសម្លាប់រង្គាលនៅសាលារៀនក្នុងទីក្រុង Peshawar កាលពីធ្នូ ឆ្នាំ២០១៤ផងដែរ។
ការវាយប្រហារដោយការបំផ្ទុះគ្រាប់បែកអត្តឃាតកាលពីថ្ងៃទី២៩ ខែធ្នូ ឆ្នាំ២០១៥ ដែលសម្លាប់មនុស្សយ៉ាងរង្គាលនោះកើតឡើងនៅបន្ទាប់ពីកងកម្លាំងសន្តិសុខរដ្ឋាភិបាលចាត់វិធានការចំពោះការវាយប្រហារមួយលើករបស់ក្រុមតាលីបង់ប៉ាគីស្ថានបណ្តាលឲ្យស្លាប់មនុស្ស១៥០នាក់រួចមក ។
ប្រតិបត្តិការប្រឆាំងទៅលើក្រុមឧទ្ទាមរបស់កងកម្លាំងទាហានរដ្ឋាភិបាល បានធ្វើឲ្យសកម្មភាពរបស់ក្រុមឧទ្ទាមមានការស្ងប់ស្ងាត់ទៅវិញខ្លះដែរអំពីការវាយប្រហារ ដូចដែលធ្លាប់បានកើតឡើងជារៀងរាល់ខែក្នុងឆ្នាំ២០១៤នោះ ៕
ប្រែសម្រួល៖ ថាច់ យ៉ាត
