ខេត្ដសៀមរាប៖ បុរសពីរនាក់ត្រូវបានកម្លាំងនគរបាលចម្រុះនៃស្នងការដ្ឋានខេត្តសៀមរាប ធ្វើការឃាត់ខ្លួនមកសាកសួរ ដោយជាប់ពាក់ព័ន្ធប្រើអាវុធខុសច្បាប់ ខណៈដែលសមត្ថកិច្ចចុះ ត្រួតពិនិត្យរដ្ឋបាលនៅក្នុងភូមិចំនួន០២គឺភូមិវត្តបូព៌ និងភូមិជន្លង់នៃសង្កាត់សាលាកំរើក។ ការចុះធ្វើរដ្ឋបាលនោះ កម្លាំងបានធ្វើការឃាត់ខ្លួនជនសង្ស័យចំនួន២នាក់ដោយមានអាវុធខ្លីម៉ាកK៥៤ចំនួន០១ដើម បង់ចំនួន០១មានគ្រាប់ចំនួន០៦គ្រាប់ និងដកហូតម៉ូតូចំនួន០១គ្រឿងម៉ាកឌុក(DUKE)
ហេតុការណ៍នេះបានធ្វើឡើងនៅរសៀលថ្ងៃទី៣០ ខែធ្នូ ឆ្នាំ២០១៥ ស្ថិតក្នុងភូមិវត្តបូព៌ និងភូមិជន្លង់នៃសង្កាត់សាលាកំរើក ក្រុងសៀមរាប ។
មន្ត្រីនគរបាលក្រុងសៀមរាបបានឲ្យដឹងថា ការចុះត្រួតពិនិត្យផ្ទះជួលសរុបចំនួន១៥កន្លែងផ្ទះ ស្មើនឹងចំនួន១៣៧បន្ទប់ មានមនុស្សស្នាក់នៅ សរុបចំនួន៣២៧នាក់ ប្រុស១៤៧នាក់ ក្នុងនោះ ក្រុមចម្រុះបាន នាំខ្លួនជនសង្ស័យ ចំនួន០២នាក់ ជាមួយនឹងវត្ថុតាងដូចខាងលើ។
ជនសង្ស័យទី១/ឈ្មោះ ផុង ប្រុស អាយុ២៤ឆ្នាំ មានស្រុកកំណើត ភូមិ ថ្លុកក្រវ៉ាន់ ឃុំបុសខ្នុរ ស្រុកចំការលើ ខេត្តកំពង់ចាម (ឃាត់ខ្លួនថ្ងៃទី២៩) ទី២/ឈ្មោះ យាប សុភ័ក្រ ភេទប្រុស អាយុ ៣២ឆ្នាំ ស្នាក់នៅភូមិ ១០មករា ឃុំបុស្សខ្នុរ ស្រុកចំការលើ ខេត្តកំពង់ចាម មកស្នាក់នៅក្នុងក្រុងសៀមរាបបានរយៈពេល២ខែ នៅកន្លែងហាងម៉ាស្សានៅកែងជន្លង់។ ជនសង្ស័យទាំង០២នាក់នេះ ជាប់ពាក់ព័ន្ធចំនួន ២ករណី ករណីទី១ ប្រើប្រាស់និងកាន់កាប់អាវុធដោយខុសច្បាប់ ករណីទី២ ករណីអំពើលួចយកម៉ូតូ មានស្ថានទម្ងន់ទោស។ម៉ូតូដែលដកហូតបាន ម៉ាក ឌុក (DUKE) ជាម៉ូតូ របស់ជនរងគ្រោះ ។
សមត្ថកិច្ចបន្តថា យោងតាមពាក្យបណ្តឹងរបស់ជនរងគ្រោះ ឈ្មោះជន់ ម៉េង ឈាង អាយុ ២៣ឆ្នាំ ភេទ ប្រុស ដែលបានបាត់ម៉ូតូកាលពីថ្ងៃទី២៩ឆ្លងចូលថ្ងៃទី៣០ខែវិច្ឆិកា ឆ្នាំ២០១៥ នៅចំណុច មុខបន្ទប់ជួល ក្រោយហាងសែនសប្បាយ២ ភូមិវត្តបូព៍ សង្កាត់សាលាកំរើក ម៉ូតូត្រូវបាននគរបាលប៉ុស្តិ៍រដ្ឋបាលសង្កាត់សាលាកំរើក ធ្វើការប្រគល់ទទួល ត្រឡប់ទៅឲ្យជនរងគ្រោះវិញរួចហើយ។រីឯជនសង្ស័យរួមទាំងវត្ថុតាងត្រូវបានកម្លាំងនគរបាលខេត្តកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ៕
ដោយ៖ ជានិរន្ដរ៍
