ខេត្តបាត់ដំបង៖ ផ្ទះមួយខ្នងធ្វើអំពីឈើលើថ្មក្រោមប្រក់ស័ង្កសីទំហំ៧ម៉ែត្រគុណ៨ម៉ែត្រ ត្រូវបានអគ្គិភ័យឆាបឆេះអស់ទាំងស្រុង ខណៈដែលម្ចាស់ផ្ទះចាក់សោរចោលហើយទៅចំការទុកឱ្យកូនតូចៗនៅចាំផ្ទះ ។
ហេតុការណ៍កើតឡើងកាលពីវេលាម៉ោង៦ល្ងាចថ្ងៃទី៣០ ខែធ្នូ ឆ្នាំ២០១៥ នៅចំណុចភូមិកណ្តាល ឃុំអូររំដួល ស្រុកភ្នំព្រឹក ខេត្តបាត់ដំបង។ អគ្គិភ័យនេះបើតាមសេចក្តីរាយការណ៍ពីសមត្ថកិច្ចមូលដ្ឋានឱ្យដឹងថា អគ្គិភ័យនោះមិនបង្កឱ្យនរណាម្នាក់ទទួលរងគ្រោះនោះទេ អគ្គិភ័យក៏មិនបន្តទៅរាលដាលឆាបឆេះផ្ទះអ្នកជិតខាងនៅក្បែរនោះបន្ថែមទៀតឡើយដោយមានការជួយអន្តរាគមន៍ពីសំណាក់ប្រជាពលរដ្ឋនិងសមត្ថកិច្ច។
សេចក្តីរាយការណ៍ឱ្យដឹងទៀតថា នៅពេលអគ្គិភ័យកំពុងកើតឡើងគេឃើញប្រជាពលរដ្ឋនិងសមត្ថកិច្ចបាននាំគ្នាទៅជួយន្តរាគមន៍នោះដែរ ក៏ប៉ុន្តែមិនអាចរារាំងអគ្គិភ័យបាននោះឡើយក្នុងរយៈពេលជាងកន្លះម៉ោងប៉ុណ្ណោះផ្ទះទាំងមូលបានរងការឆាបឆេះអស់តែម្តង។
ក្រោយពីកើតហេតុនោះហើយសមត្ថកិច្ចបានចុះទៅស្រាវជ្រាវស៊ើបអង្កេតជុំវិញបញ្ហាអគ្គិភ័យខាងលើ សមត្ថកិច្ចធ្វើការសន្និដ្ឋានបឋមមូកហេតុបង្កឡើងដោយទុស្សេខ្សែភ្លើង អគ្គិភ័យផ្តើម ឆេះពីខាងលើផ្ទះ។
ម្ចាស់ផ្ទះរងគ្រោះត្រូវបានគេស្គាល់ប្តីឈ្មោះ ផាន រឹត អាយុ៤៧ឆ្នាំប្រពន្ធឈ្មោះ ផានហាង អាយុ៤៧ឆ្នាំ ។
ទ្រព្យសម្បត្តិដែលរងការខូចខាតត្រូវបានម្ចាស់ផ្ទះប្រាប់ឱ្យដឹងថារួមមានប្រាក់អាមេរិក ៥ពាន់ដូល្លា ប្រាក់ខ្មែរ៧លានរៀល ទូរទស្សន៍៣គ្រឿង គ្រែបេងចំនួន៤ឈុត និងសម្ភារៈនៅក្នុងផ្ទះមួយចំនួនធំទៀត ៕
ដោយ៖ សំ វិច្ឆិកា
