ភ្នំពេញ៖ រថយន្តកាមរីបាឡែនបួងចង្កូតបតឆ្លងផ្លូវបានទៅបុកបញ្ឆិតរថយន្តកូរ៉ូឡាពីក្រោយ ដែលបើកបញ្ច្រាស់ទិសគ្នាខូចខាតបន្តិចបន្ទួច ហើយបានបន្តទៅបះបញ្ឆិតរថយន្តហាយឡាក់វីហ្គូ បន្ថែមទៀតធ្វើឲ្យម្ចាស់រថយន្តហាយឡាក់វីហ្គូភ័យពេកបានបួងចង្កូតថយក្រោយបុករថយន្តរ៉េងរ៉ូវើ បណ្ដាលឲ្យកំពិតកាងពីមុខរងការខូចខាត ។
ក្នុងហេតុការណ៍គ្រោះថ្នាក់ចរាចរណ៍នេះមិនបណ្ដាលឲ្យនរណាម្នាក់រងរបួសនោះទេ និងបានកើតឡើងកាលពីវេលាម៉ោង៨និង២០នាទីយប់ ថ្ងៃទី១ ខែមករា ឆ្នាំ២០១៦ តាមបណ្ដោយផ្លូវ៤៥៦ កែងផ្លូវ១៣៥ ស្ថិតក្នុងសង្កាត់ទួលទំពុង១ ខណ្ឌចំការមន។
ប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តបង្កម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ2AH.0382 បើកបរដោយបុរសម្នាក់ក្នុងទិសដៅពីជើងទៅត្បួងតាមបណ្ដោយផ្លូវ១៣៥ ខណះមកដល់កែងផ្លូវ៤៥៦ ដែលជាចំណុចកើតហេតុបានបួងចង្កូតបតឆ្វេង ក៏បានជ្រុលទៅបុករថយន្តកូរ៉ូឡា ពណ៌ខ្មៅ ពាក់ស្លាកលេខភ្នំពេញ2P.0239 ដែលបើកបញ្ច្រាស់ទិសគ្នា ចំបញ្ឆិតគូទរថយន្តរងការខូចខាតបន្តិចបន្ទួច ហើយបានទៅបះបញ្ឆិតពីមុខរថយន្តហាយឡាក់វីហ្គូ ពណ៌ទឹកប្រាក់ ពាក់ស្លាកលេខ ខេមរះភូមិន្ទ០២ 2.3039 ដែលបើកដោយជនជាតិបរទេសម្នាក់ស្របទិសគ្នាជាមួយរថយន្តកូរ៉ូឡានោះរងការខូចខាតបន្តិចបន្ទួច។ដោយឡែកជនជាតិបរទេសដែលជាម្ចាស់រថយន្តហាយឡាក់វីហ្គូ ពេលដែលឃើញមានប៉ះគ្នានោះភ្លាមៗក៏បានបើករយែរថយន្តថយក្រោយយ៉ាងលឿនជ្រុលបុករថយន្តរ៉េងរ៉ូវើ ពណ៌ខ្មៅ ពាក់ស្លាកលេខ ភ្នំពេញ 2X.0268 ដែលបើកតាមពីក្រោយនោះ បានកំពិតកាងពីមុខទ្រុតចូលក្នុងខូចខាតបន្តិច ។
ក្រោយពេលកើតហេតុភាគីខាងម្ចាស់កូរ៉ូឡា ដោយឃើញរថយន្តខ្លួនខូចខាតបន្តិចបន្ទូចនិងមិនចង់មានរឿងវែងឆ្ងាយក៏ព្រមបើករថយន្តចេញពីកន្លែងកើតហេតុយកទៅជួសខ្លូនឯង។ដោយឡែករថយន្តបង្កម៉ាកកាមរីបាឡែនបានព្រមសងថ្លៃខូចខាតទៅលើរថយន្តហាយឡាក់វីហ្គូ ចំនួន៥០$ហើយរថយន្តហាយឡាក់វីហ្គូបានសងថ្លៃខូចខាងទៅលើរថយន្តរ៉េងរ៉ូវើចំនួន៣០០ដុល្លារ បញ្ចប់រឿងនៅនិងកន្លែងកើតហេតុតែម្ដង៕
ដោយ៖ ភារ៉ា ដង្កោ
