ភ្នំពេញ៖ បុរសម្នាក់បើករថយន្ដសាំយុងមួយគ្រឿង ក្នុងល្បឿងលឿនដល់ចំណុចផ្លូវកោងមិនប្រយ័ត្នជ្រុលចង្កូតបុកឃឿនទ្រូងផ្លូវ ហើយរថយន្ដមិនទាន់អស់ល្បឿនជ្រុលឡើងឃឿនរង្វង់មូលជ្រោយចង្វាបណ្ដាលអោយរងការខូចខាត ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៣និង១៥ទៀបភ្លឺ ថ្ងៃទី០២ ខែមករា ឆ្នាំ២០១៦ នៅចំណុចរង្វង់មូលជ្រោយចង្វា ស្ថិតក្នុងសង្កាត់ ជ្រោយចង្វា ខណ្ឌជ្រោយចង្វា រាជធានីភ្នំពេញ ។
ព្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានរថយន្ដមួយគ្រឿងម៉ាកសាំយ៉ុង ពណ៍ស្លែ ពាក់ស្លាកលេខ ភ្នំពេញ 2S-2760 បើកបរដោយបុរសម្នាក់ក្នុងល្បឿនលឿនធ្វើដំណើរតាមបណ្ដោយផ្លូវជាតិលេខ៦ ទិសដៅពីជើងទៅត្បូងលុះមកដល់ចំណុចកើតហេតុដែលជាចំណុចផ្លូវកោង បានជ្រុលចង្កូតទៅបុកទ្រូងសួនច្បារទ្រួងផ្លូវ ហើយរថយន្ដមិនទាន់អស់ល្បឿនជ្រុលឡើងឃឿនរង្វង់មូលបណ្ដាលអោយរងការខូចខាត តែមិនបណ្ដាលអោយមានអ្នករងរបួសនោះទេ ។
ក្រោយកើតហេតុម្ចាស់រថយន្ដបានបើកទ្វាររថយន្ដចុះរត់គេចខ្លួនបាត់បន្សល់រថយន្ដទុកនៅកន្លែងកើតហេតុ។ ចំណែករថយន្ដកម្លាំងជំនាញចុះវាស់វែងស្ទួចយករថយន្ដទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ ៕
ដោយ៖ ព្រែកជ័យ
