ភ្នំពេញ៖ សាខាគយ និងរដ្ឋាកររាជធានីភ្នំពេញបានចុះឆែកឆេរទីតាំងលក់ទូរស័ព្ទ២កន្លែងនៅសង្កាត់ផ្សារដេប៉ូ២ ដែលហាងទី១មានយីហោ អារីណេរ ទី២ យីហោ គួងអ៊ី ស្ថិតតាមបណ្តោយផ្លូវលេខ២១៥ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ។
ហេតុការណ៍នេះបានកើតឡើងកាលពីវេលាម៉ោង២និង៣០នាទីរសៀល ថ្ងៃទី២ ខែមករា ឆ្នាំ២០១៦ ។ ប្រតិបត្តិការណ៍នេះ កម្លាំងគយ និងរដ្ឋាកររាជធានីភ្នំពេញមិនបានឃាត់ និងដកហូតទីតាំងហាងទូរស័ព្ទទាំង២កន្លែងនេះទេ ដោយគេបានអះអាងថា ទីតាំងលក់ទូរស័ព្ទទាំងពីរនេះ មានការបង់ពន្ធត្រឹមត្រូវ ប៉ុន្តែគ្រាន់តែខ្វះបច្ចេកទេសមិនបានបិទតែមពន្ធនៅលើទូរស័ព្ទតែប៉ុណ្ណោះ ។ ទោះបីយ៉ាងណា ជាក់ស្តែងក្នុងពេលចុះប្រតិបត្តិការណ៍ខាងលើនេះ គេឃើញម្ចាស់ហាងទូរស័ព្ទ នៅពេលដែលឃើញគយចុះប្រតិបត្តិការនោះ ពួកគាត់បានមកលួចចរចាដោយស្ងាត់ៗ ដោយហាងគួងអ៊ីលក់ទូរស័ព្ទ ត្រូវបង់ពន្ធឲ្យគយចំនួន២ម៉ឺន៦ពាន់ដុល្លារ តែដោយមានការចរចា ទើបកម្លាំងគយទាំងនោះ បានដកថយទៅវិញ ដោយមិនបានដកហូតទូរស័ព្ទគេចពន្ធក្នុងហាងទាំងទាំងពីរនោះឡើយ ។
ដូច្នេះហើយ មជ្ឈដ្ឋានជុំវិញបានសំណូមពរឲ្យមន្ត្រីគយទាំងនោះ បើហ៊ានអនុវត្តច្បាប់ហើយនោះ កុំលួចចរចាស្ងាត់ៗ ទាំងផ្ទុយនឹងច្បាប់បែបនេះ ហើយប្រជាពលរដ្ឋបានអំពាវនាវទៀតថា អង្គភាពប្រឆាំងអំពើពុករលួយ គួរតែពិនិត្យទៅលើស្ថាប័នគយនាពេលបច្ចុប្បន្ននេះផង ពីព្រោះការអនុវត្តចាប់រថយន្ត ទូរស័ព្ទដៃ និងគ្រឿងអេឡិចត្រូនិកផ្សេងៗទៀតដែលគ្មានបង់ពន្ធ ដោយឃើញភាពជាក់ស្តែង គឺមន្ត្រីគយទាំងនោះគ្រាន់តែចុះបង្អើលក្រុមឈ្មួញឲ្យរត់មករកពួកគាត់ដើម្បីបង់ប្រាក់ចូលហោបៅតែប៉ុណ្ណោះ ៕
ដោយ៖ ស ដារ៉ា
