ភ្នំពេញ៖ បុរសជាម្ចាស់រ៉ុម៉កសណ្ដោងបានរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះភ្លាមៗ ដោយសារតែរថយន្តសុិនទ្រីមួយគ្រឿងបើកបរក្នុងល្បឿនលឿនមកបុករ៉ុម៉កសណ្ដោងពីក្រោយពេញទំហឹងបណ្ដាលឲ្យធ្លាក់ជនរងគ្រោះ ហើយរ៉ុម៉កសណ្ដោងបានបន្តទៅបុករថយន្តមួយគ្រឿងដែលចតមុខផ្ទះបណ្ដោលឲ្យរងការខូចខាត ។

ហេតុការណ៍គ្រោះថ្នាក់ចរាចរណ៍ខាងលើនេះបានបង្កឡើងកាលពីវេលាម៉ោង១៥ និង២០រសៀល ថ្ងៃទី២ ខែមករា ឆ្នាំ២០១៦ នៅចំណុចមុខផ្សារសារឿនយ៉ាន្នី  តាមបណ្ដោយផ្លូវ២១៧ ស្ថិតក្នុងភូមិតាឡី សង្កាត់ដង្កោ ខណ្ឌដង្កោ ។

បើតាមសាក្សីដែលឃើញហេតុការណ៍នេះបានឲ្យដឹងថា មុខពេលកើតហេតុគេសង្កេតឃើញ រថយន្តសិុនទ្រី ពណ៌លឿង គ្មានស្លាកលេខ បើកបរដោយក្នុងទិសដៅពីជើងទៅត្បួងតាមបណ្ដោយផ្លូវ២១៧ ហើយក្នុងល្បឿនលឿន ខណៈមកដល់ចំណុចកើតហេតុបានបុករ៉ុម៉កសណ្ដោងពីក្រោយបណ្ដាលឲ្យបុរសម្នាក់ធ្លាក់ទៅលើថ្នល់រងរបួសធ្ងន់ ហើយរ៉ុម៉កសណ្ដោងបានបន្តទៅបុករថយន្តទីកូ ពណ៌ខ្មៅ បិតស្កុតស ពាក់ស្លាកលេខភ្នំពេញ2P.9841 ដែលចតចោលមុខផ្ទះ និងពីកន្លែងប្រហែល១០០ម៉ែត្រដែលនៅខាងឆ្វេងកន្លែងបុករ៉ម៉កសណ្ដោង បណ្ដាលឲ្យរងការខូចខាត ។

ក្រោយពេលកើតហេតុអ្នកបើកបររថយន្ដសុិនទ្រីបានបើកទ្វារត់គេចខ្លួនបាត់ស្រមោលតែភ្លាមៗ រីឯជនរងគ្រោះត្រូវបានរថយន្តសាមុយដឹកទៅសង្គ្រោះភ្លាមៗ ។ ដោយឡែករថយន្តបង្កទាំងរ៉ុម៉កសណ្ដោង និងរថយន្តរងគ្រោះត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌដង្កោ រងចាំដោះស្រាយតាមនីតិវិធី ៕

ដោយ៖ ភារ៉ា ដង្កោ