ភ្នំពេញ៖ នៅល្ងាចថ្ងៃទី២០ ខែធ្នូ នេះ លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់លោក សារុន វីថូរ៉ាត់ ថៅកែការ៉ាស់សាំង PTT កូនប្រុសលោកតំណាងរាស្ត្រ ច័ន្ទ សារុន ពីបទហិង្សាដោយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ ។
ចំណែកគ្រូបង្រៀន ត្រូវបានដោះលែងអោយមានសេរីភាព វិញ ព្រោះរកមិនឃេីញពីការប្រព្រឹត្តបទល្មេីសលួចថតរូបអាក្រាតនារីក្នុងបន្ទប់ទឹក ។
នេះបេីតាមប្រភពព័ត៌មានច្បាស់ការណ៍មួយ។
បច្ចុប្បន្ន ថៅកែការ៉ាស់សាំង PTT ត្រូវបានបញ្ជូនទៅអធិការដ្ឋាននគរបាលខណ្ឌដង្កោ វិញ រង់ចាំនីតិវិធី ចៅក្រមស៊េីបសួរ នៅថ្ងៃទី២១ ខែធ្នូ ។
លោក សារុន វីថូរ៉ាត់ ត្រូវបានជនរងគ្រោះ ចោទប្រកាន់ថា បានបញ្ជាអោយកូនចៅព្រួតវៃស្ទើរស្លាប់ ដោយអះអាងថា បានលួចថតនារីក្នុងបន្ទប់ទឹក កាលពីយប់ថ្ងៃទី១៦ ខែធ្នូ ថ្មីៗនេះ៕
...
ដោយ៖ ចេស្តា
