ខេត្តស្វាយរៀង៖ ស្ត្រីដែលគេស្គាល់ជាម្ចាស់ហាងយីហោសំណាងអាណេបានរងរបួសធ្ងន់ខណះត្រូវជនសង្ស័យមានតួនាទីជាអធិការងក្រុងបាវិតបានយកកាំភ្លើងបាញ់ឡើងលើមួយគ្រាប់និងបាញ់ចំក្បាលមួយគ្រាប់ហើយរត់គេចខ្លួនបង្កការភ្ញាក់ផ្អើលដល់ភ្ញៀវអង្គុយផឹកស៊ីរត់ចែកជើងគ្នាកាលពីវេលាម៉ោង៦និង១០នាទីព្រលប់ថ្ងៃទី២០ ខែធ្នូ ឆ្នាំ២០១៩ ដែលមានទីតាំងស្ថិតក្នុងភូមិ តាពៅ សង្កាត់បាវិត ក្រុងបាវិត ខេត្តស្វាយរៀង សង្ស័យរឿងគំនុំ ។
បើតាមសមត្ថកិច្ចនគរបាលបានបង្ហើបថាជនរងគ្រោះមានឈ្មោះ សឿន ដាណេ មានវ័យ៣៨ឆ្នាំ រស់នៅភូមិក្រាំងអាត់ឃុំកំពង់សីលាស្រុកកំពង់សីលា ខេត្តព្រះសីហនុ ។
ចំណែកជនសង្ស័យមានឈ្មោះ កែវ ចិត្រា អាយុ២៨ឆ្នាំ មុខរបរអធិការរងនគរបាលក្រុងបាវិត មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វារៀង ក្រោយពេលបង្ករហេតុក៏បានគេចខ្លួនប៉ុន្តែក្រោយមកបានចូលទៅសារភាពនៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀង ។
ប្រភពបន្តថាមុនកើតហេតុជនសង្ស័យបានចូលហាងផឹកស៊ីមួយកន្លែងយីហោសំណាងអាណេរក្រោយមកមិនដឹងជាមានរឿងអ្វីស្រាប់តែជនសង្ស័យទាញយកកាំភ្លើងបាញ់ប្រហារ មកលើជនរងគ្រោះយ៉ាងព្រៃផ្សៃតែម្ដង។
បន្ទាប់ពីកេីតហេតុភ្លាមៗជនរងគ្រោះត្រូវបានក្រុមគ្រួសារប្រញ៉ាប់ប្រញាលបញ្ជូនទៅសង្គ្រោះបន្ទាន់នៅមន្ទីរពេទ្យប្រទេសវៀតណាម។
សូមបញ្ជាក់ថាជនសង្ស័យត្រូវជាកូនប្រុសអធិការនគរបាលក្រុងបាវិតនិងទើបឡើងកាន់តំណែងថ្មីៗជាអធិការរងនគរបាលក្រុងបាវិតទទួលផែនគ្រឿងញៀនផងដែរ ៕
