ក្រុងប៉ោយប៉ែត៖ យ៉ាងហោចណាស់ មានមនុស្ស៥នាក់បានរងរបួសធ្ងន់និង ស្រាលដោយសាររថយន្ដឡិចស៊ីស470មួយគ្រឿងបានបែកកង់ក្រឡាប់ធ្លាក់ផ្លូវកាលពីព្រឹកថ្ងៃទី៤ ខែមករា ឆ្នាំ២០១៥ នៅចំណុចខាងលិចវត្ដសិរីមង្គលសុទ្ធារាម ហៅវត្ដស្ទឹងបត់ ស្ថិតក្នុងភូមិស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត ខេត្ដបន្ទាយមានជ័យ ។
តាមរបាយការណ៍របស់មន្ដ្រីនគរ បាលជំនាញបានបង្ហាញថា អ្នករបួសទាំង៥នាក់ពុំត្រូវ បានស្គាល់ឈ្មោះនោះទេ តែគេគ្រាន់តែ ដឹងថា ក្នុងនោះមានម្នាក់ជាជនជាតិខ្មែរ (អ្នកបើកបររថយន្ដ) និង៤នាក់ទៀត ជាជន ជាតិចិន ។
ប្រភពបានបញ្ជាក់ទៀតថា មុនពេល កើតហេតុមនុស្សទាំង៥នាក់បានជិះរថយន្ដម៉ាកឡិចស៊ីស470 ពណ៌ត្រីឆ្លូញចង្កូត ស្ដាំបើកបរក្នុងទិសដៅពីលិចទៅកើត តាមបណ្ដោយផ្លូវជាតិលេខ៥ក្នុងល្បឿន លឿន។ លុះមកដល់ចំណុចកើតហេតុរថយន្ដ ខាងលើនេះបានបែកកង់ធ្វើឱ្យរេចង្កូតក្រឡាប់ ធ្លាក់ផ្លូវបណ្ដាលឱ្យអ្នកជិះក្នុងរថយន្ដរង របួសធ្ងន់២នាក់និងស្រាល៣នាក់។ ចំណែក រថយន្ដរងការខូចខាតយ៉ាងធ្ងន់ធ្ងរ។
ក្រោយកើតហេតុសមត្ថកិច្ចជំនាញក៏បានចុះធ្វើអន្ដរាគមន៍និងបានហៅរថយន្ដសង្គ្រោះមកដឹកអ្នករបួសទៅកាន់មន្ទីរ ពេទ្យ ។ រីឯរថយន្ដត្រូវបាននាំយកទៅ រក្សាទុកនៅអធិការដ្ឋាននគរបាលក្រុង ប៉ោយប៉ែតដើម្បីរក្សាទុកឱ្យម្ចាស់វិញ ៕
ដោយ៖ វណ្ណា
