ភ្នំពេញ៖ បុរសម្នាក់ស្រវឹងបើករថយន្ដកាមរីហាយព្រីធបត់ឆ្វេងឆ្លងផ្លូវមិនប្រយ័ត្នជ្រុលបុកម៉ូតូវីវ៉ាមួយគ្រឿងដែលធ្វើដំណើរបញ្ច្រាសទិសគ្នា បណ្ដាលអោយមនុស្សប្រុសស្រីចំនួនបីនាក់រងរបួសធ្ងន់និងស្រាល។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២៣ និង៣០នាទីយប់ថ្ងៃទី០៤ ខែមករា ឆ្នាំ២០១៥ នៅចំណុចផ្លូវព្រះសុធារស់ កែងនិងផ្លូវលេខ២៩៤ ស្ថិតក្នុងសង្កាត់ទន្លរបាសាក់ ខណ្ឌចំការមន រាជធានីភ្នំពេញ។
សាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ដមួយគ្រឿងម៉ាក កាមរីហាយព្រីធ ពណ៍ទឹកប្រាក់ ពាក់ស្លាកលេខ ភ្នំពេញ2Q-0069 បើកបរដោយបុរសម្នាក់និងរួមដំណើរជាមួយនារីម្នាក់ ធ្វើដំណើរតាមបណ្ដោយផ្លូវព្រះសុធារស់ ទិសដៅពីត្បូងទៅជើង លុះដល់ចំណុចកើតហេតុបានបត់ឆ្វេងឆ្លងផ្លូវបំណងចូលទៅផ្លូវលេខ២៩៤ ក៏ជ្រុលទៅបុកម៉ូតូវីវ៉ាមួយគ្រឿង ពណ៍ខ្មៅគ្មានស្លាកលេខធ្វើដំណើរបញ្រ្ចាសទិសគ្នា ជិះដោយប្ដីប្រពន្ធនិងមានកូនតូចម្នាក់រួមដំណើរជាមួយ បណ្ដាលអោយបុរសជាប្ដីនិងកូនតូចរងរបួសធ្ងន់ចំណែកស្ដ្រីជាប្រពន្ធរងរបួសស្រាល។
ក្រោយកើតហេតុជនរងគ្រោះត្រូវបានរថយន្ដសង្រ្គោះបន្ទាន់ដឹកយកទៅសង្គ្រោះនៅមន្ទីរពេទ្យភ្លាមៗ ចំណែកអ្នកបើករថយន្ដបង្កត្រូវបានសមត្ថកិច្ចធ្វើការឃាត់ខ្លួន។ រីឯរថយន្ដនិងម៉ូតូត្រូវបានកម្លាំងជំនាញចុះធ្វើការវាស់វែងយកទៅរក្សាទុកនៅអធិការដ្ឋានខណ្ឌចំកាមន ដើម្បីធ្វើការដោះស្រាយតាមនិតិវិធីច្បាប់៕
ដោយ៖ ស រស្មី
