ភ្នំពេញ៖តារាកំប្លែងជើងចាស់នាយ ស្មាញ ត្រូវបានរថយន្តធន់ធំដឹកដី កិនស្លាប់នៅត្រង់ចំណុចផ្លូវ៦០ម៉ែត្រ ស្តុបរថយន្តម៉ាកសឺដេស កែងផ្លូវ ៣០ម៉ែត្រ កាលពីវេលាម៉ោងជាង ៥ ល្ងាចថ្ងៃទី ២៨ ខែធ្នូ ឆ្នាំ២០១៩ នេះ ខណៈភរិយារបស់លោកបានរងរបួសធ្ងន់យកទៅសង្គ្រោះបន្ទាន់នៅមន្ទីរពេទ្យ។គ្រោះថ្នាក់ដល់អាយុជីវិតនេះគឺកើតមានឡើងក្រោយពីតារាកំប្លែងរូបនេះទើបនឹងស្រាកស្រានពីជំងឺក្អួតធ្លាក់ឈាមកាលពីពេលកន្លងទៅនេះ។
តាមការបញ្ជាក់របស់សាក្សានៅកន្លែងកើតហេតុបានបញ្ជាក់ថាជនរងគ្រោះបានគាបជាប់ ខាងក្រោមរថយន្តតែម្តង ខណៈអ្នកបើកបរត្រូវបាននាំខ្លួនទៅប៉ុស្តិ៍នគរបាលចាក់អង្រែក្រោម។ ជនរងគ្រោះបានជិះម៉ូតូទ្រីមសង់ 1B-6970 ខណៈរថយន្តបង្កពាក់ស្លាកលេខ 3E-7789 ធន់ធំដឹកដី ។ អ្នកបើកបរមានឈ្មោះ ទិត ទី រស់នៅក្នុងស្រុកស្រីសន្ធរ ខេត្តកំពង់ចាម។
សមាគមសិល្បករខ្មែរបានចាត់ លោក ម៉ារ៉ា ប៊ុណ្ណា តំណាងមូលនិធិ “សិល្បៈចាស់ជរា” បាននាំយកថវិកា២លានរៀល របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ទៅចូលបុណ្យសពនាយស្មាញ នៅឯគេហដ្ឋានទល់មុខវត្តព្រែកហូរ។
គួរបញ្ជាក់ដែរថាតារាកំប្លែងជើងចាស់ នាយស្មាញ បានបាត់មុខពីវិស័យសិល្បៈ ដោយសារតែត្រូវជួបជាមួយនឹងស្ថានភាពជំងឺប្រចាំកាយ សភាពគួរឲ្យបារម្ភ គ្មានទាំងប្រាក់ដើម្បីធ្វើការព្យាបាលខ្លួននាពេលកន្លងមក។ជំងឺរបស់លោកត្រូវបានគេដឹងថា ជំងឺនោមធ្លាក់ឈាម ដែលវាអាចប្រែទៅជាជំងឺមហារីក តម្រូវធ្វើការវះកាត់ជាបន្ទាន់ ។ ស្ថានភាពជំងឺតារាកំប្លែងរូបនេះបានធូស្បើយឡើងវិញក្រោយពីតារាកំប្លែងរូបនេះទទួលបានការព្យាបាលពីពេទ្យស្ម័គ្រចិត្ត THYDA សម្តេចតេជោ។ ប៉ុន្តែជាអកុសល្យតារាសម្តែងជើងចាស់ម្នាក់ទៀតហើយបានទទួលមរណភាពដែលបន្សល់ទុកនូវការសោកស្តាយសម្រាប់ទស្សនិកជន៕

ដោយ វឌ្ឍនា