ភ្នំពេញ៖លោក គ្រុយ លឹមហេង អតីតអគ្គកុងស៊ុល នៃស្ថានអគ្គកុងស៊ុលព្រះរាជាណាចក្រកម្ពុជាប្រចាំទីក្រុងគុនមិញ ខេត្តយូណាន សាធារណរដ្ឋប្រជាមានិតចិន ត្រូវបានសមត្ថកិច្ចអង្គភាពប្រឆាំងអំពើពុករលួយ ហៅកាត់ថា ACU ឃាត់ខ្លួន បញ្ជូនមកអយ្យការអមសាលាដំបូងរាជធានីភ្នំពេញ នៅថ្ងៃទី២៩ ខែធ្នូ នេះ ដើម្បីសាកសួរករណីប្រព្រឹត្តអំពើពុករលួយ ។

អ្នកនាំពាក្យអយ្យការអមសាលាដំបូងរាជធានីភ្នំពេញ លោក គុជ គឹមឡុង ថ្លែងថា ពេលនេះ ខាងអយ្យការកំពុងសាកសួរតាមនីតិវិធីហើយ ។ ពាក់ព័ន្ធករណីអ្វីពិតប្រាកដនោះ លោក គុជ គឹមឡុង បដិសេធមិនធ្វើអត្ថាធិប្បាយទេ ដោយរង់ចាំបញ្ចប់នីតិវិធីនៃការសាកសួរសិន ទើបជម្រាបជូនលទ្ធផល នាពេលក្រោយ ។

ជាមួយគ្នានេះ ពុំទាន់អាចទំនាក់ទំនងសុំការបញ្ជាក់ពីលោក កុយ កួង អ្នកនាំពាក្យក្រសួងការបរទេស បាននៅឡើយទេ ដោយសារទូរស័ព្ទចូលគ្មានអ្នកទទួល ។

ប្រភពព័ត៌មានក្រៅផ្លូវការមួយ បង្ហើបប្រាប់ថា លោក គ្រុយ លឹមហេង អាយុ៤៥ឆ្នាំ ជាប់សង្ស័យពីបទ បំផ្លាញដោយចេតនា និង គៃបំបាត់ដោយទុច្ចរិត រំលោភអំណាច និង វិតិក្រម ប្រព្រឹត្តកាលពីអំឡុងឆ្នាំ២០១៦ ដល់ខែមិថុនា ឆ្នាំ២០១៨ និង ករណីមិនប្រកាសទ្រព្យសម្បត្តិនិងបំណុល ប្រព្រឹត្តនៅព្រះរាជាណាចក្រកម្ពុជា ចាប់ពីឆ្នាំ២០១៥ដល់ឆ្នាំ២០១៩ ។

ប្រភពព័ត៌មានក្រៅផ្លូវការដដែលបន្តថា លោកគ្រុយ លឹមហេង ពាក់ព័ន្ធនឹងការបាត់សន្លឹកទិដ្ឋាការស្អិតចំនួន១៦០០សន្លឹក ការក្លែងបន្លំសន្លឹកទិដ្ឋាការស្និតចំនួន៥០០សន្លឹក និងភាពមិនប្រក្រតីនៃការប្រើប្រាស់ថវិកាចំណាយចំណូលរបស់ស្ថានអគ្គកុងស៊ុលព្រះរាជាណាចក្រកម្ពុជាប្រចាំទីក្រុងគុនមិញ ខេត្តយូណាន សាធារណរដ្ឋប្រជាមានិតចិន ៕