ខេត្តក្រចេះ ៖ ក្រុមការងារស្រាវជ្រាវសត្វផ្សោតបានថតបង្ហាញកូនផ្សោតដែលត្រូវបានកត់ត្រាថាបានកើតនៅក្នុងឆ្នាំ២០២០នេះ ។ កូនសត្វផ្សោតទើបកើតថ្មីមួយក្បាលដែលមានអាយុកាលប្រហែលជាពីរថ្ងៃ ត្រូវបានគេប្រទះឃើញក្នុងក្រុមហ្វូងផ្សោតធំដែលមានចំនួនប្រមាណជាបួនក្បាលត្រង់ចំណុចអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី២៣ ខែកុម្ភៈ ឆ្នាំ២០២០ ។
ក្រុមការងារបានរំឭកថា កាលពីដើមខែកុម្ភៈកន្លងទៅនេះផងដែរ អ្នកតាមដានសត្វផ្សោតទន្លេមេគង្គដែលមកពីខណ្ឌរដ្ឋបាលជលផលខេត្តក្រចេះ និងស្ទឹងត្រែង និងអង្គការ WWF-កម្ពុជា បានចុះសិក្សា និងតាមដានចំនួនសត្វផ្សោតទន្លេមេគង្គ ដោយជិះទូក និងថតរូបសត្វផ្សោតទន្លេមេគង្គ ដើម្បីធ្វើការវិភាគអត្តសញ្ញាណរបស់សត្វផ្សោត តាមដងទន្លេមេគង្គ ចម្ងាយ ១៩០ គ.ម ចាប់ពីទីរួមខេត្តក្រចេះ ទៅដល់ព្រំប្រទល់ឡាវក្នុងខេត្តស្ទឹងត្រែង។ ក្នុងដំណើរសិក្សានេះ ក្រុមការងារក៏បានប្រទះឃើញកូនផ្សោតទើបកើតថ្មីចំនួនពីរក្បាលផងដែរ ៕
សូមអានអត្ថបទ អំពីដំណើរសិក្សាស្រាវជ្រាវទាំងស្រុងនៅទីនេះ៖ http://www.wwf.org.kh/?uNewsID=360034
