ភ្នំពេញ៖ កីឡាករ ឯម សារ៉ាក់ មក ពីក្លិបឫទ្ធីពោធិ៍សែនជ័យត្រូវប៉ះជាមួយកីឡាករ សេន កុសល មកពីក្លបមោង ឫស្សីមរតកគុនខ្មែរខេត្ដបាត់ដំបង ។ ចំណែកកីឡាករ យ៉ាម ឡយ សិស្សគុន របស់ក្លិបរស្មីកុមារកំព្រាត្រូវប្រកួតជាមួយកីឡាករ តាំង សីហា អ្នកប្រដាល់ មកពីក្លិបកងពលតូចលេខ៧០ក្នុងកម្ម វិធីប្រកួតកីឡាប្រដាល់ដណ្ដើមពាន រង្វាន់ TIFFY SUPER FIGHT ប្រភេទ ទម្ងន់៥៧គីឡូក្រាមនាល្ងាចថ្ងៃអាទិត្យ ទី១០ ខែមករា ឆ្នាំ២០១៥ នៅលើ សង្វៀនទូរទស្សន៍ប៉ុស្ដិ៍លេខ៥អារីណា ។
នៅក្នុងចំណោមកីឡាករទាំង៤នាក់ ខាងលើសុទ្ធតែពុំមានប្រវត្ដិជួបប្រកួត គ្នាម្ដងណាទេ ប៉ុន្ដែកីឡាករ យ៉ាម ឡយ ធ្លាប់មានបទពិសោធន៍ក្នុងកម្មវិធី TIFFY SUPER FIGHT ប្រភេទទម្ងន់ ៦០គីឡូក្រាមវគ្គទី១ហើយក៏ត្រូវធ្លាក់ ត្រឹមជុំទី២ប៉ុណ្ណោះ ។
សម្រាប់ជំនួបប្រកួតរវាងកីឡាករ ឯម សារ៉ាក់ នឹង សេន កុសល បើអ្នក ណាឈ្នះនឹងទទួលបានកៅអីរង់ចាំឡើង ទៅប្រកួតនៅជុំទី២វគ្គជម្រុះ១៦នាក់បន្ដទៀត ។ មុនឈានដល់ការប្រកួតវគ្គជម្រុះ ៣២នាក់ក្នុងកម្មវិធី TIFFY SUPER FIGHT ប្រភេទ ទម្ងន់៥៧គីឡូក្រាម នេះ ពួកគេសុទ្ធតែបានវាយឈ្នះដៃគូប្រកួត រៀងៗខ្លួន។ ក្នុងនោះកីឡាករ ឯម សារ៉ាក់ វាយឈ្នះកីឡាករសំណាង គង្គា និង កីឡាករសេន កុសល វាយផ្ដួលកីឡាករ ម៉ន សាម៉េត ឱ្យបោះបង់ការប្រកួត ក្នុងទឹកទី២ ។
ចំណែកឯកីឡាករ យ៉ាម ឡយ និង តាំង សីហា ក៏មិនខុសពីអ្នកប្រដាល់២ នាក់ខាងលើដែរ ដោយពួកគេត្រូវតែ ស្វែងរកជ័យជម្នះដូចគ្នា ប៉ុន្ដែសម្រាប់ អ្នកដែលវាយចាញ់ត្រូវចាក់ចេញពីកម្មវិធី TIFFY SUPER FIGHT រដូវកាល ទី២នេះ រីឯអ្នកឈ្នះឡើងទៅរង់ចាំប្រកួត ជុំទី២ដែលមានសមាសភាពកីឡាករ ទាំង១៦នាក់ដែលបានឆ្លងផុតពីវគ្គជម្រុះ៣២នាក់ខាងលើ ។ កីឡាករ យ៉ាម ឡយ ប្រកួតចុងក្រោយវាយចាញ់កីឡាករ ធន់ ចាន់តាក់ មកពីក្លិបមជ្ឈមណ្ឌលកីឡា កងយោធពលខេមរភូមិន្ទដោយពិន្ទុ។ ចំណែកកីឡាករ តាំង សីហា វាយឈ្នះ កីឡាករ លីម ចំណាន មកពីបុរីរាជសីហ៍ មានឫទ្ធិដោយពិន្ទុ ។
គួររំលឹកថា ការប្រកួតកីឡាប្រដាល់ ក្បាច់គុនបុរាណខ្មែរដណ្ដើមពានរង្វាន់ TIFFY SUPER FIGHTជុំទី១វគ្គជម្រុះ កីឡាករ៣២នាក់ទុកតែ១៦នាក់មាន តម្លៃខ្លួនសម្រាប់អ្នកវាយឈ្នះចំនួន១៥០ដុល្លារនិងអ្នកចាញ់ចំនួន១០០ដុល្លារ។
នៅថ្ងៃអាទិត្យ ទី១០ ខែមករានេះដែរ ក៏មានការប្រកួតចំនួន៣គូបន្ថែមទៀត ក្រៅពីគូវាយដណ្ដើមពានរង្វាន់ TIFFY SUPER FIGHT គឺតម្រូវលើកីឡាករ ខន សុខុន មកពីក្លិបរាជសីហ៍ខេត្ដរតន គិរី ប្រកួតជាមួយ កីឡាករ គង់ ហ៊ូវ មកពីក្លិបកងពលធំអន្ដរាគមន៍លេខ២ ក្នុងទម្ងន់៥៧គីឡូក្រាម ។ កីឡាករ អាន សុផល មកពីក្លិបសុភានូកីឡាជួបប្រកួត ជាមួយកីឡាករ ម៉ូ ណារ៉ាក់ មកពីក្លិប ព្រៃទទឹងខេត្ដបាត់ដំបងក្នុងទម្ងន់៥៧គីឡូ ក្រាម ៕
ដោយ៖ សារីម
