ភ្នំពេញ៖ រថយន្តមួយគ្រឿងបានបុកបុរសជនជាតិចិនពីរនាក់ពេលកំពុងជិះម៉ូតូឌុបគ្នាបណ្តាលឲ្យដួលបាក់កស្លាប់ម្នាក់និងម្នាក់ទៀតរងរបួសស្រាល ហើយរថយន្តបង្កបានបើករត់បាត់ដោយសុវត្ថិភាព ។
ហេតុការណ៍នេះកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី១៤ ខែមករា ឆ្នាំ២០១៦ នៅផ្លូវម៉ៅសេទុងត្រង់ទល់មុខវត្តទួលទំពូង សង្កាត់ទួលទំពូង១ ខណ្ឌចំការមន ។
សពជនរងគ្រោះត្រូវបានគេស្គាល់ឈ្មោះ ឡេវ ស៊ីងពីងភេទប្រុស អាយុ៣៦ឆ្នាំជនជាតិចិនមុខរបរបុគ្គលិកក្រុមហ៊ុននាំគ្រឿងចក្រ ស្នាក់នៅផ្ទះជួល ម្តុំផ្សារទួលទំពូង សង្កាត់ទួលទំពូង ១ ខណ្ឌចំការមន ចំណែកអ្នករងរបួសស្រាលជាជនជាតិចិនដូចគ្នាមិនស្គាល់ ។
ប្រភពព័ត៌មានពីកន្លែងកើតហេតុការណ៍បានឲ្យដឹងថា មុនពេលកើតហេតុជនរងគ្រោះជាជនជាតិចិន២នាក់ខាងលើបាន ជិះម៉ូតូមួយគ្រឿងម៉ាក YAMAHA NOZZA ពណ៌សពាក់ស្លាក់លេខភ្នំពេញ ១BO៥៧៨៩ធ្វើដំណើរតាមផ្លូវម៉ៅសេទុង ទិសដៅពីលិចទៅកើត ។ លុះមកដល់កន្លែងកើតហេតុ ស្រាប់តែមានរថយន្តមិនចាំម៉ាក និងស្លាកលេខមួយគ្រឿង បានធ្វើដណើរទិសដៅស្របគ្នា ក្នុងល្បឿនលឿន បានជ្រុលទៅបុកម៉ូតូជនរងគ្រោះពីក្រោយ បណ្តាលបុរសជាជនជាតិចិនម្នាក់ ដួលបោកបាក់កស្លាប់នឹងកន្លែង និងម្នាក់ទៀតរងរបួសស្រាលហើយពេលនោះរថយន្តបង្កមិនឈប់ទេបែរជាបន្ថែមល្បឿនបើករត់គេចបាត់ស្រមោលតែម្តង ។
ប្រភពព័ត៌មានដដែលឲ្យដឹងទៀតថា ក្រោយពេលកើតហេតុសមត្ថកិច្ចនគរបាលជំនាញចុះទៅដល់វាស់វែងនិងប្រគល់សពឲ្យ មិត្តភក្ដិយកទៅតម្កល់ទុកនៅវត្តទួលទំពូងរង់ចាំស្ថានទូតចិនមកពិនិត្យដើម្បីក្រុមគ្រួសារយកទៅធ្វើបុណ្យតាមប្រពៃណី។ចំណែកម៉ូតូត្រូវសមត្ថកិច្ច យកទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំញាតិមិត្តសពមកទទួលយកទៅប្រើប្រាស់វិញ ៕
ដោយ៖ ប្រាថ្នា
