នាយយើងអង្គុយផឹកកាហ្វេនៅតាមចិញ្ចើមផ្លូវក្បែរមន្ទីរពេទ្យកាល់ម៉ែត ឮគេជជែកគ្នាអំពីសីលធម៌គ្រូពេទ្យ ដែលពាក់ព័ន្ធនឹងករណីកើតឡើងថ្មីៗអំពីគណៈគ្រូពេទ្យកម្ពុជាទទូចឲ្យលោកបណ្ឌិតម្នាក់សុំទោស ដែលនិយាយចោទប្រកាន់ថា គ្រូពេទ្យ ស្ទើរតែ៩នាក់ ក្នុងចំណោម១០នាក់ ខ្វះក្រមសីលធម៌ ។ ប៉ុន្តែលោកបណ្ឌិតអ្នកមានទ្រព្យសម្បត្តិម្នាក់នោះប្រកាសថា មិនសុំទោសជាដាច់ខាត ។ ជជែកដល់ត្រង់នេះ អុំប្រុសម្នាក់បានបន្ទរបែបទំនងជាចង់ចំអកឲ្យគណៈគ្រូពេទ្យផងក៏មិនដឹង ដោយបានស្រែកខ្លាំងៗថា «បើពេទ្យខ្លាំងប្តឹងបណ្ឌិតនោះទៅ!» ។
បុរសម្នាក់ទៀតទំនងជាមន្ត្រីពេទ្យដែលចូលនិវត្តន៍ លបនិយាយខ្សឹបៗថា «ហ៊ានប្តឹងហ្អី! បើវាបែបនេះមែន!» ។
អ្នកផ្សេងទៀត បានបញ្ចេញយោបល់ប្លែកៗគ្នា ប៉ុន្តែជាទូទៅជំរុញឲ្យជម្រះមន្ទិលសៅហ្មងអំពីបញ្ហានេះ ដោយគេយល់ថា នៅគ្រាដែលលោកបណ្ឌិតម្នាក់នោះមិនសុំទោស ដូច្នេះមានន័យថា អ្វីដែលលោកបណ្ឌិតមានប្រសាសន៍ អំពីបញ្ហាគ្រូពេទ្យសព្វថ្ងៃនេះជារឿងត្រឹមត្រូវ ។ ដូច្នេះ ដើម្បីរកស-ខ្មៅឲ្យឃើញ មានតែស្ថាប័នតុលាការមួយប៉ុណ្ណោះ ។ មតិភាគច្រើននៅក្នុងហាងកាហ្វេជំរុញឲ្យគណៈគ្រូពេទ្យកម្ពុជាប្តឹងបុគ្គលម្នាក់នោះ ដើម្បីរកភាពស្អាតត្រឹមត្រូវរបស់ខ្លួន ។
ប៉ុន្តែអ្នកខ្លះយល់ថា អាចនឹងវ័ន្តកខ្លួនឯងទៅវិញទេ គណៈគ្រូពេទ្យអើយ! អ្វីដែលសំខាន់គឺត្រូវទទួលស្គាល់ការពិត ហើយកែប្រែចំណុចខុសឆ្គងអវិជ្ជមានទាំងនោះ ទើបគេថា យើងជាមនុស្សខ្លាំង ហើយត្រឹមត្រូវ ។ ផ្ទុយទៅវិញអ្វីដែលគណៈគ្រូពេទ្យស្នើឲ្យលោកបណ្ឌិតសុំទោសជាសាធារណៈនោះ មានន័យថា គ្រូពេទ្យនៅកម្ពុជាបច្ចុប្បន្ន មិនបានប្រព្រឹត្តដូចអ្វីដែលលោកបណ្ឌិតបានលើកឡើងនោះឡើយ ។
សម្រាប់អ្នកផឹកកាហ្វេនៅតាមចិញ្ចើមផ្លូវ ក៏ដូចជាបណ្តាជនកម្ពុជាផ្សេងទៀតគាំទ្រប្រសាសន៍លោកបណ្ឌិតនិយាយពីរឿងសីលធម៌គ្រូពេទ្យនោះ ។ បុរសសក់សម្នាក់និយាយថា បើមិនប្តឹងផ្តល់ទេ ធ្វើប្រជាមតិទៅថា តើគ្រូពេទ្យសព្វថ្ងៃវាយ៉ាងម៉េច? គាត់និយាយបន្តថា អ្នកមានលុយ, អ្នកមានអំណាចមួយចំនួនពេលមានជំងឺ មិននៅព្យាបាលក្នុងស្រុកនោះឡើយ គេមិនដឹងថា តើស្ថានភាពសុខាភិបាលនៅក្នុងប្រទេសកម្ពុជាយ៉ាងម៉េចទេ ។
ស្ថិតក្នុងដំណាក់កាលនេះ ម្នាក់ៗសុទ្ធតែយកត្រូវរៀងខ្លួន ។ ការនៅស្ងៀមរបស់គណៈគ្រូពេទ្យកម្ពុជាចំពោះការមិនសុំទោសរបស់លោកបណ្ឌិត គឺស្មើនឹងមានន័យថា អ្វីដែលលោកបណ្ឌិតបាននិយាយជាការពិត ។ ដូច្នេះបើគណៈគ្រូពេទ្យចិត្តសឿង ប្តឹងម្តងមើល! ពូម្នាក់និយាយថា កុំប្តឹង ព្រោះការពិតយើងជាគ្រូពេទ្យយ៉ាងដូច្នោះមែន! ។
សម្រាប់នាយយើង មិនកាន់ជើងខាងណាទេ ប៉ុន្តែឮតែគេនិយាយថា ពេទ្យស្រុកខ្មែរយើងយ៉ាប់ណាស់ ។ បើទោះជាចង់ដឹងស-ខ្មៅយ៉ាងណាក៏ដោយ នាយយើងមិនប្រាថ្នាឲ្យមានជំងឺដើម្បីសាករសជាតិពេទ្យ ព្រោះតែចង់ដឹងស-ខ្មៅនោះឡើយ ៕
ដោយ៖ នាយសូរ
