ខេត្តស្វាយរៀង៖ ពីរនាក់ប្តីប្រពន្ធជិះម៉ូតូហុងដាឌ្រីម សេ១២៥ ពណ៌ខ្មៅ ដឹកគ្នាតាមបណ្តោយផ្លូវជាតិលេខ១ ត្រូវរថយន្តកាមរីបាឡែន ពណ៌ទឹកប្រាក់ ពាក់ស្លាកលេខ ស្វាយរៀង 2A-1717 បើកបរក្នុងទិសដៅបញ្ច្រាសទិសគ្នាបុកពេញទំហឹងលាន់ដូចរន្ទះ បណ្តាលប្តីអ្នកបើកម៉ូតូស្លាប់នៅកន្លែងកើតហេតុ យ៉ាងអាណោចអាធ័ម និងប្រពន្ធស្លាប់ពេលបញ្ជូនដល់មន្ទីរពេទ្យ ។

ហេតុការណ៍នេះបានកើតឡើង កាលពីវេលាម៉ោង២១ និង៣០យប់ ថ្ងៃទី១៨ ខែមករា ឆ្នាំ២០១៦ នៅចំណុចភូមិកំពោតប្រស់​ សង្កាត់​ច្រកម្ទេស ​ក្រុង​បាវិត ខេត្តស្វាយរៀង ។

បើតាមសមត្ថកិច្ចនៅកន្លែងកើតហេតុបានប្រាប់អោយដឹងថា ជនរងគ្រោះជាប្តី ឈ្មោះ ​សុខ​ សុម៉ាលី​ មុខ​របរ​ កម្មករសំណង់​ និងប្រពន្ធឈ្មោះ លឹម ​ស្រី​ណាក់ មុខរបរ កម្មការិនីរោងចក្រ​ មានទីលំនៅភូមិថ្នល់ជាតិ សង្កាត់ច្រកម្ទេស ក្រុងបាវិត ខេត្តស្វាយរៀង ។ ក្រោយពេលកើតហេតុរថយន្តបង្កមានបំណងបើកគេចចេញពីកន្លែងកើតហេតុ តែត្រូវបាននគរបាលក្រុងបាវិតស្ទាក់ចាប់បាន ។

បច្ចុប្បន្នសាកសពបានប្រគល់អោយគ្រួសារធ្វើបុណ្យតាមប្រពៃណី និងមធ្យោបាយរក្សាទុកនៅអធិការដ្ឋាននគរបាលក្រុងបាវិត ចាត់ការតាមច្បាប់ ៕