ខេត្តក្រចេះ៖ កាលពីវេលាម៉ោង៩ព្រឹក ថ្ងៃទី១៩ ខែមករា ឆ្នាំ២០១៦ នាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្តៃប្រទេស ប្រធានគណៈកម្មការជាតិ ដើម្បីទប់ស្កាត់បង្ក្រាបបទល្មើសព្រៃឈើបានចុះទៅដល់ទីតាំង ឈ្មួញលាក់ទុកឈើ នៅចំណុចតំបន់អូរគគីរ ស្ថិតក្នុងឃុំរលួសស្រែចេស ស្រុកសំបូរ ខេត្តក្រចេះ រួមដំណើរនាយឧត្តមសេនីយ៍សៅ សុខា មានការចូលរួមពីលោក ស ចំរ៉ុង អភិបាលនៃគណៈអភិបាលខេត្តក្រចេះ ដែលជាសមាជិកក្នុងគណៈកម្មការជាតិ លោក សាន ប៊ុនថាន មេបញ្ជាការកងរាជអាវុធហត្ថខេត្តក្រចេះ និងសមត្ថកិច្ច មន្ត្រីជំនាញជាច្រើននាក់ទៀត ។
នាយឧត្តមសេនីយ៍ សៅ សុខា បានមានប្រសាសន៍នៅទីនោះយ៉ាងដូច្នេះថា ជំនាញត្រូវតែធ្វើការស៊ើបអង្កេត រកឲ្យឃើញពិតប្រាកដ តើឈើទាំងអស់នេះ ជាឈើរបស់ក្រុមហ៊ុន កាប់នៅក្នុងដីព្រៃសម្បទានរបស់ខ្លួន ឬមួយយ៉ាងណា ពីព្រោះប្រភេទឈើទាំងអស់នេះ អាចមិនមែនកាប់នៅក្នុងដីព្រៃសម្បទាននេះ ។
ប្រភពគួរឲ្យជឿទុកចិត្តបានបង្ហើបថា មានឈ្មួញធំ២រូប គឺចែ នី និងឈ្មោះ ថា ហៅ កខ្លី ជាអ្នកចាំប្រមូលទិញឈើពីស្រុកកោះញែក ខេត្តមណ្ឌលគិរី យកមកលាក់ទុកនៅទីនោះ និងមានឧកញ៉ា វន្ត ប៊ុនថៃ ហៅឧកញ៉ាថៃ ជាអ្នកដឹកបន្តពីទីនោះ ឆ្ពោះទៅកាន់វៀតណាមតាមខេត្តត្បូងឃ្មុំ និងមួយចំនួនទៀតឆ្លងទៅវៀតណាម តាមខេត្តព្រៃវែង ។ បន្ទាប់ពីចុះត្រួតពិនិត្យ ទីតាំងឈើដោយផ្ទាល់ នាយឧត្តមសេនីយ៍សៅ សុខា ក៏បានដឹកនាំក្រុមការងារបន្តទៅពិនិត្យកន្លែងផ្សេងៗទៀត ។
លោក ទ្រី សុភក្ត្រ នាយខណ្ឌរដ្ឋបាលព្រៃឈើខេត្តក្រចេះបានប្រាប់នគរវត្តតាមទូរស័ព្ទនាព្រឹកថ្ងៃទី១៩ ខែមករា ឆ្នាំ២០១៦ថា ជាបឋម ជំនាញខាងរដ្ឋបាលព្រៃឈើរបស់លោកបានវាស់ឃើញឈើចំនួន៣១៧១កំណាត់ ហើយមិនទាន់វាស់វែងចប់សព្វគ្រប់នៅឡើយទេ គិតមកដល់ត្រឹមម៉ោង១១ព្រឹក ថ្ងៃដដែលនេះ ៕
ដោយ៖ សុខ ខេមរា
