ខេត្តកំពង់ស្ពឺ៖ បងបង្កើតម្នាក់ត្រូវបាននគរបាលស្រុកសំរោងទងឃាត់ខ្លួនភ្លាមៗខណៈដែលវាយប្អូនស្រីនឹងដំបងរហូតដល់ស្លាប់គ្រាន់តែទំនាស់ពាក្យសម្តីតិចតួចហើយប្អូនស្រីយកប៉ោយដងទឹកវាយក្បាលបងសោះផ្ទុះកំហឹង។

ហេតុការណ៍នេះបានកើតឡើងកាលពីវេលាម៉ោង៨ និង៤០នាទីព្រឹកថ្ងៃទី១៩ ខែមករា ឆ្នាំ២០១៦ នៅក្នុងភូមិសំប៉ាន ឃំុតំាងក្រូច ស្រុកសំរោងទង ខេត្តកំពង់ស្ពឺ។

នគរបាលស្រុកសំរោងទងបានអោយដឹងថា ជនសង្ស័យដែលឃាត់មានឈ្មោះ ជៀប ជឿន ហៅកុយ អាយុ៤០ឆ្នាំ មុខរបរធ្វើស្រែ មានទីលំនៅភូមិសំប៉ាន ឃុំតាំងក្រូច ស្រុកសំរោងទង ខេត្តកំពង់ស្ពឺ។ ចំណែកជនរងគ្រោះមានឈ្មោះ ជៀប សុខន អាយុ៣៦ឆ្នាំ ដែលត្រូវជាប្អូនស្រីបង្កើត រស់នៅក្នុងផ្ទះជាមួយគ្នា។

នគរបាលបន្តថា នៅមុនពេលកើតហេតុពីរនាក់បងប្អូននេះមានទំនាស់ពាក្យសម្តីតិចតួចហើយដោយខឹងឈ្មោះ ជៀប សុខនជា ប្អូនស្រីខឹងក៏បានយកប៉ោយទឹកវាយចំក្បាលបងប្រុស ទើបធ្វើឲ្យបងប្រុស យកដំបងឈើជ្រុងប្រវែង 1.20 មx7សម វាយក្បាល បណ្តាលឲ្យជនរងគ្រោះស្លាប់នៅនឹងកន្លែងកើតហេតុ។

បន្ទាប់ពីមានហេតុការណ៍នោះត្រូវនគរបាលក៏ឃាត់ខ្លួនភ្លាមៗយកមកស្នងការខេត្តរងចំាបញ្ជូនបន្តដើម្បីចាត់ការតាមផ្លូវច្បាប់៕

ដោយ៖ សេនា សក្តិ