ខេត្តបន្ទាយមានជ័យ៖ អ្នកខេត្តបន្ទាយមានជ័យនិងភ្ញៀវទេសចរបរទេសដែលបានធ្វើដំណើរឆ្លងកាត់ខេត្តបន្ទាយមានជ័យ កាលពីល្ងាចថ្ងៃទី១៨ ខែមករា ឆ្នាំ២០១៦ នាំគ្នាភ្ញាក់ផ្អើល ខណៈដែលមានរថយន្តគយចល័ត១គ្រឿងនៅចំណុចសាលាក្រហម ស្រុកអូរជ្រៅក្រោមឱវាទលោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យបើកយ៉ាងលឿនប្រជែងរថយន្តជាច្រើនគ្រឿងមិនខ្លាចបង្កគ្រោះថ្នាក់និងសុវត្ថិភាពអាយុជីវិតអ្នកដទៃនោះឡើយ ។
រថយន្តគយគេឃើញបើកដេញចេញពីចំណុចត្រួតពិនិត្យសាលាក្រហមឃុំសំរោង ស្រុកអូរជ្រៅក្នុងល្បឿនលឿន ដើម្បីចាប់រថយន្តកាមរីដឹកទំនិញសំពីងសំពោងមួយគ្រឿងដែលគេសង្ស័យជាថា រថយន្តដឹកទំនិញគេចពន្ធខុសច្បាប់ចេញពីប៉ោយប៉ែត បង្កឱ្យអ្នកដែលធ្វើដំណើរឆ្លងកាត់ផ្លូវជាតិលេខ៥នៅពេលនោះនាំគ្នាភ័យស្លន់ស្លោទាំងព្រលឹងចុងសក់ ។ រថយន្តកាមរីដឹកទំនិញនោះបន្ទាប់មកត្រូវបានគយចាប់បាននៅខាងមុខស្នាក់ការសាខាគយនិងរដ្ឋាករនៅចំណុចក្បែរទីបញ្ជាការដ្ឋានកងរាជអាវុធហត្ថខេត្ត ។ ក្រោយមកគេឃើញម្ចាស់រថយន្តដឹកទំនិញបានចូលទៅចរចាជាមួយគយនៅក្នុងស្នាក់ការប្រហែល២០នាទី បន្ទាប់មកគេឃើញរថយន្តកាមរីដឹកទំនិញនោះ ត្រូវបានដោះលែងបើកចេញទៅបាត់ដែលការដោះលែងនោះគឺស្ថិតក្នុងការមន្ទិលសង្ស័យមានអាថ៌កំបាំងជាទីបំផុត ។
ជុំវិញនៃបញ្ហាដោះលែងរថយន្តដឹកទំនិញនោះទៅវិញ អ្នកយកព័ត៌មាន បានទំនាក់ទំនងទូរស័ព្ទ លោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ កាលពីរសៀលថ្ងៃទី១៩ ខែមករា ឆ្នាំ២០១៦ ឱ្យលោកជួយឆ្លើយបំភ្លឺ ទូរស័ព្ទលោកមិនអាចទំនាក់ទំនងបាននោះទេ។
លោកម៉ក់សំ សំបាន ប្រធានក្រុមគយចល័តប្រចាំសាលាក្រហមនិងជាអនុប្រធានសាខាគយនិងរដ្ឋាករខេត្តបន្ទាយមានជ័យបានបំភ្លឺឱ្យដឹងថា រថយន្តនោះដឹកទំនិញបង់ពន្ធត្រឹមត្រូវក៏ប៉ុន្តែរថយន្តមិនចូលប្រកាសនៅកន្លែងត្រួតពិនិត្យរបស់គយហើយបើកហួសកន្លែងត្រួតពិនិត្យ ដោយ កូនចៅលោកមិនដឹងបានដេញចាប់តែម្តងនឹកស្មានថារថយន្តនោះដឹកផ្ទុកទំនិញខុសច្បាប់។នៅពេលចាប់រថយន្តនោះបានគយគ្រាន់តែអប់រំធ្វើយ៉ាងណាឱ្យម្ចាស់ចូលមកបង្ហាញត្រួតពិនិត្យ លិខិតស្នាមបង់ពន្ធ ហើយក៏ដោះលែងទៅវិញ។
សូមរំលឹកថាកន្លងមកការដេញតាមចាប់រថយន្តដឹកទំនិញគេចពន្ធពីសំណាក់សមត្ថកិច្ចឈរជើងនៅតាមដងផ្លូវជាតិលេខ៥ ធ្លាប់បានបង្កគ្រោះថ្នាក់ដល់អាយុជីវិតប្រជាពលរដ្ឋជាញឹកញាប់ដោយ រថយន្តដឹកទំនិញគេចពន្ធបើកគេចពីការដេញប្រម៉ាញ់របស់សមត្ថកិច្ចហើយជ្រុលបុកប្រជាពលរដ្ឋស្លូតត្រង់បណ្តាលឱ្យបាត់បង់ជីវិតជាបន្តបន្ទាប់។
ករណីដែលរថយន្តគយដេញចាប់រថយន្តកាមរីដឹកផ្ទុកទំនិញសំពីងសំពោងខាងលើដែលគេសង្ស័យរថយន្តដឹកតំនិញគេចពន្ធខុសច្បាប់ កាលពីល្ងាចម្សិលមិញនោះបានរងការរិះគន់ពីណាក់ប្រជាពលរដ្ឋយ៉ាងខ្លាំង ប្រជាពលរដ្ឋលើកឡើងថា បើសិនជាការប្រដេញរបស់គយចាប់រថយន្តនោះហើយជ្រុលទៅបុកប្រជាពលរដ្ឋស្លូតត្រង់ និងភ្ញៀវទេសចរបរទេសធ្វើដំណើរឆ្លងកាត់បណ្តាលឱ្យស្លាប់បាត់បង៉ជីវិតថាតើអ្នកណាជាអ្នកចេញមុខទទួលខុសត្រូវ?
សូមបញ្ជាក់ថា ក្នុងតំណាក់កាលការគ្រប់គ្រងដឹកនាំរបស់លោ ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យទើបតែមុខកាន់តំណែង ជំនួសលោក ថោង សុ ខាំភូ អតីតប្រធានសាខាគយនិងរដ្ឋាករខេត្តបន្ទាយមានជ័យ ត្រូវគេមើលឃើញថា លោកបានដឹកនាំកម្លាំងគយខិតខំបង្ក្រាបរថយន្តក្រុងដឹកទំនិញគេចពន្ធខុសច្បាប់បានជាបន្ទាប់ ក្នុងវិធានការរិតបន្តឹងរកចំណូលពន្ធចូលរដ្ឋ គ្រាដែលខេត្តបន្ទាយមានជ័យត្រូវបានថ្នាក់លើឱ្យគយនៅខេត្តបន្ទាយមានជ័យយ៉ាងហោចណាស់ត្រូវប្រមូលពន្ធចូលរដ្ឋក្នុងខែ៣០លានដុល្លារ។
ក៏ប៉ុន្តែទន្ទឹមដែលមានវិធានការការរិតបន្តឹងបង្ក្រាបការដឹកទំនិញរត់ពន្ធខុសច្បាប់ ពីសំណាក់លោក ឆែ សុធា ក៏ត្រូវគេមើលឃើញថា រថយន្តដឹកទំនិញត្រូវគេសង្ស័យជាទំនិញគេចពន្ធខុសច្បាប់មានចំនួនកើនឡើងច្រើនហើយដឹកផ្ទុកទំនិញហូរហៀរទាំងយប់ទាំងថ្ងៃ មានសកម្មភាពខ្លាំងជាងតំណាក់កាលក្រោមការដឹកនាំរបស់លោក ថោង សុខាំភូ អតីតប្រធានសាខាគយនិងរដ្ឋាករខេត្តបន្ទាយមានជ័យថែមទៀត។
រថយន្តដឹកទំនិញតាមរថយន្តកាមរី និងនីសាន់ នោះ ត្រូវបានលោក ថោង សុខាំភូ អតីតប្រធានសាខាគយនិងរដ្ឋាករខេត្តបន្ទាយមានជ័យ ធ្លាប់លើកឡើងថា រថយន្តទាំងនោះជារថយន្តគេពន្ធខុសច្បាប់ទាំងអស់ ៕
ដោយ៖ សំ វិច្ឆិកា
