ភ្នំពេញ ៖ លោក ម៉ុក ច័ន្ទករុណា អភិបាលរងខណ្ឌដូនពេញ បានដឹកនាំក្រុមការងារសំណង់ខណ្ឌ ចុះត្រួតពិនិត្យទីតាំងការដ្ឋានសាងសង់ដែលគ្មានច្បាប់អនុញ្ញាត កាលពីព្រឹកថ្ងៃអង្គារ ១២កេីត ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០២ ខែមិថុនា ឆ្នាំ២០២០ វេលាម៉ោង០៩និង០០នាទី ស្ថិតនៅច្រកផ្លូវលេខ៤៥ ភូមិ១៧ សង្កាត់ស្រះចក ខណ្ឌដូនពេញ ។
លោកអភិបាលរងខណ្ឌបន្តថា ពេលចុះដល់ទីតាំងជាក់ស្តែង លោកពិនិត្យឃើញថា មិនមានអ្នកមានសិទ្ធិតំណាងឲ្យម្ចាស់ទីតាំងទាំងពីរនេះទេ។ ដោយក្រុមការងារបានព្យាយាមទំនាក់ទំនងជាមួយម្ចាស់ទីតាំងទាំង២ទីតាំងសួរនាំអំពីលិខិតអនុញ្ញាត និងឯកសារពាក់ព័ន្ធមកបង្ហាញក្រុមកាងារ ក៏ប៉ុន្តែមិនមានអ្នកមានឯកសារយកមកបង្ហាញនោះទេ ។
ក្នុងប្រតិបត្តិការនោះដែរ លោកអភិបាលរងបានមានមតិណែនាំដូចខាងក្រោម៖
១ – ត្រូវផ្អាកការដ្ឋានជាបណ្តោះអាស្នន និងត្រូវយកឯកសារពាក់ព័ន្ធ និងលិខិតអនុញ្ញាតសាងសង់មកបង្ហាញផ្ទៀងផ្ទាត់ នៅការិយាល័យរៀបចំដែនដី នគរូបនីយកម្ម សំណង់ និងភូមិបាលខណ្ឌដូនពេញ នៅថ្ងៃទី០៤ ខែមិថុនា ឆ្នាំ២០២០ វេលាម៉ោង០៩ និង០០នាទី ។
២ – ចំពោះរោងស័ង្កសីបណ្តោះអាសន្ន ក្រុមការងារ នឹងសុំគោលការណ៍ដឹកនាំពីលោកអភិបាលខណ្ឌ បន្ត ។
ក្រោយចុះត្រួតពិនិត្យរួច ក្រុមការងារបានអានកំណត់ហេតុជូនតំណាងម្ចាស់ទីតាំងទាំងពីរខាងលើស្តាប់ចប់សព្វគ្រប់ ហើយតំណាងម្ចាស់ទីតាំង បានឯកភាពតាមការណែនាំរបស់ក្រុមការងារទាំងស្រុង ៕ដោយ៖ស តារា
