ភ្នំពេញ៖ ជនសង្ស័យម្នាក់ ជាមុខសញ្ញាចោរលួចកញ្ចក់រថយន្ត ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃ ឃាត់ខ្លួនក្រោយធ្វើសកម្មភាពកាច់កញ្ចក់រថយន្តមួយគ្រឿងបានសម្រេច រួចគេចខ្លួនបាត់ជាង១០ម៉ោង ។
ករណីឃាត់ខ្លួនជនសង្ស័យខាងលើនេះ បានកើតឡើងកាលពីវេលាម៉ោង ៤និង៣០នាទីល្ងាច ថ្ងៃទី០២ ខែមិថុនា ឆ្នាំ២០២០ នៅចំណុចរបងមន្ទីរពេទ្យគន្ធបុប្ផា តាមបណ្ដោយផ្លូវលេខ៤៧ កែងផ្លូវលេខ៩០ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពពីម្ចាស់រថយន្ត បានប្រាប់ឲ្យដឹងថា កាលពីវេលា ០១និង៤០នាទីរំលងអាធ្រាត្រឈាន ថ្ងៃទី២ ខែមិថុនា ឆ្នាំ២០២០ គាត់បានទុក រថយន្តមួយគ្រឿងម៉ាក តូយូតាធុនត្រា ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ ២BH-៩១២៧ នៅខាងមុខហាងកាហ្វេរបស់គាត់ដូចសព្វដង លុះមកដល់ម៉ោងប្រហែល ០២រំលងអាធ្រាត្រ ស្រាប់តែមានជនសង្ស័យ២នាក់ ជិះម៉ូតូ មួយគ្រឿងម៉ាក ហុងដាវ៉េវ ពណ៌ក្រហម មិនចាំស្លាកលេខ ដែលធ្វើដំណើរតាមបណ្ដាយផ្លូវលេខ១១៤ទិសដៅពីលិចទៅកេីត ។ ខណៈមកដល់ចំណុចកើតហេតុ ជនសង្ស័យ បានឈប់ម៉ូតូ រួចជនសង្ស័យម្នាក់ បានចុះពីលើម៉ូតូ និងបានធ្វើសកម្មភាពលួច ឆ្កឹះកញ្ចក់រថយន្តខាងស្តាំដែរចតនៅមុខហាង ។ ភ្លាមនោះរូបគាត់ជាម្ចាស់រថយន្តក៏ស្ទុះចេញពីក្នុងហាងដេញតាមចាប់ពីក្រោយ ប៉ុន្ដែតាមមិនទាន់ដោយសារជនសង្ស័យរត់ឡើងម៉ូតូដើម្បីជាមួយបក្ខពួកគេចខ្លួន ។
លុះដល់ម៉ោង៤ល្ងាចថ្ងៃដដែល ជនរងគ្រោះរួមជាមួយកម្លាំងសមត្ថកិច្ចព្រហ្មទណ្ឌក្រសួងមហាផ្ទៃ បានជិះតាមរកជនសង្ស័យរហូតមកដល់ចំណុចរបងមន្ទីរពេទ្យគន្ធបុប្ផា ក៏ប្រទះឃើញជនសង្ស័យម្នាក់ ដែលជាអ្នកធ្វើសកម្មភាពលួច និងឃាត់ខ្លួនប្រគល់ឲ្យសមត្ថកិច្ចប៉ុស្តិ៍ផ្សារថ្មី១តែម្តង។
ក្រោយពេលកេីតហេតុកម្លាំងសមត្ថកិច្ចព្រហ្មទណ្ឌក្រសួងមហាផ្ទៃបានប្រគល់ឲ្យប៉ុស្តិ៍នរគបាលរដ្ឋបាលផ្សារថ្មី១ ដេីម្បីកសាងសំណុំរឿងបញ្ជូនទៅកាន់តុលាការ ៕ដោយ៖រ៉ា រ៉ា
