ភ្នំពេញ៖ លោក William A. Heidt ឯកអគ្គរដ្ឋទូតសហរដ្ឋអាមេរិកទើបតែងតាំងថ្មីប្រចាំកម្ពុជាបានចូលជួបសម្ដែងការគួរសមនិងពិភាក្សាការងារជាមួយ លោក ខៀវ កាញារីទ្ធ រដ្ឋមន្ដ្រីក្រសួង ព័ត៌មាននាព្រឹកថ្ងៃទី២០ ខែមករា ឆ្នាំ ២០១៦នៅទីស្ដីការក្រសួងដើម្បីឈ្វេង យល់ពីប្រព័ន្ធផ្សព្វផ្សាយនៅកម្ពុជា ។
លោកឯកអគ្គរដ្ឋទូតអាមេរិកមាន ការភ្ញាក់ផ្អើលយ៉ាងខ្លាំងដោយបានឃើញពីភាពរីកចម្រើនយ៉ាងខ្លាំងរបស់ប្រទេសកម្ពុជា ពិសេសលើវិស័យព័ត៌មានក្នុង នោះមានវិទ្យុ ទូរទស្សន៍ សារព័ត៌មាន ហើយជាមួយគ្នានេះការប្រើប្រាស់បណ្ដាញ ផ្សព្វផ្សាយសង្គមក៏មានការរីកចម្រើនយ៉ាងឆាប់រហ័សបំផុត។
លោករដ្ឋមន្ដ្រីបានជម្រាបលោកឯកអគ្គរដ្ឋទូតថា បច្ចុប្បន្នច្បាប់ស្ដីពីសិទ្ធិ ទទួលព័ត៌មានមានការចូលរួមធ្វើពី តំណាងស្ថាប័នជាច្រើនរួមជាមួយសង្គមស៊ីវិល សមាគមសារព័ត៌មាន អង្គការ UNESCO ការិយាល័យអង្គការសិទ្ធិ មនុស្សនៃអង្គការសហប្រជាជាតិហើយច្បាប់នេះក្រសួងព័ត៌មានជាអ្នកធ្វើពង្រាង។ ក្រសួងព័ត៌មានក៏មានគេហទំព័រមួយ ដើម្បីជូនដំណឹងអំពីសេចក្ដីព្រាងច្បាប់ នេះដើម្បីឱ្យសាធារណជនទូទៅអាចចូលរួមជាមតិយោបល់សម្រាប់ឱ្យក្រុមកាងារ យកមកពិគ្រោះយោបល់គ្នាបន្ថែមទៀត។
លោករដ្ឋមន្ដ្រីនិងលោកឯកអគ្គរដ្ឋ ទូតអាមេរិកក៏បានលើកឡើងពីការលំបាក ក្នុងការគ្រប់គ្រងព័ត៌មានព្រោះបច្ចេក វិទ្យាព័ត៌មានវិទ្យាបច្ចុប្បន្នបានធ្វើឱ្យមនុស្ស ម្នាក់ៗក្លាយជាតួឯកក្នុងព័ត៌មានប៉ុន្ដែអ្វី ដែលសំខាន់នោះថ្នាក់ដឹកនាំដែលមាន ភាពចាស់ទុំខាងផ្នែកនយោបាយបានធ្វើឱ្យមានភាពធូរស្រាលចំពោះសភាពការណ៍ ទាំងឡាយដែលបានកើតឡើងតាមរយៈ បណ្ដាញទំនាក់ទំនងសង្គមនេះ៕
ដោយ៖ សហការី
