ភ្នំពេញ៖ ដើមត្រសេកដ៏ធំមួយដើម ត្រូវបានបាក់សង្កត់រថយន្ត១គ្រឿងខូចខាតយ៉ាងដំណំ ក្រោយពីមានភ្លៀងធ្លាក់មួយមេ លាយលំនិងខ្យល់កន្រ្តាក់បោកបក់យ៉ាងខ្លាំង ។ ប៉ុន្តែហេតុការណ៍នេះមិនបង្កឲ្យមានមនុស្សរងរបួសនោះឡើយ ។

ហេតុការណ៍នេះ បង្កការភ្ញាក់ផ្អើលឡើងកាលពីវេលាម៉ោង ១និង៤០នាទីរសៀល ថ្ងៃទី១០ ខែមិថុនា ឆ្នាំ២០២០ ចំណុចក្បែរផ្សារសូរិយាម៉លស្ថិតនៅតាមបណ្ដោយផ្លូវលេខ៦៣ (ផ្លូវត្រសក់ផ្អែម) កែងផ្លូវលេខ១៥៨ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ។

តាមប្រភពព័ត៌មានពីមន្ត្រីសមត្ថកិច្ចយាមនៅគោលដៅ បានប្រាប់ឲ្យដឹងថា នៅមុនពេលកើតហេតុ គឺមានមេឃភ្លៀងធ្លាក់ រួមនិងខ្យល់បោកបក់យ៉ាងខ្លាំង បណ្ដាលឲ្យដើមត្រសេកធំ១ដើម បាក់មែកសង្កត់លើរថយន្តម៉ាក់ Rav4 មួយគ្រឿង ពណ៌ឈាមជ្រូក ពាក់លេខភ្នំពេញ2G-5505  របស់អ្នកធ្វើដំណើរ កំពុងបើកបរតាមបណ្ដោយផ្លូវត្រសក់ផ្អែម ក្នុងទិសដៅពីត្បូងទៅជើង រងការខូចខាត់ផ្នែកដំបូលយ៉ាងដំណំ ។ប៉ុន្តែមិនបង្កឲ្យមានមនុស្សរងរបួសឡើយ។

ក្នុងហេតុការណ៍នោះដែរ លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានឲ្យដឹងដែរថា ក្រោយពីទទួលព័ត៌មានថាមានការណីបាក់ដើមត្រសេកត្រូវរថយន្តមួយគ្រឿងរងការខូចខាត នៅចំណុចកើតហេតុ ។ ភ្លាមៗលោក បានបញ្ជាកម្លាំងគណៈបញ្ជាការឯកភាព ចុះជួយសម្រួលនៅកន្លែងកើតហេតុភ្លាមៗតែម្ដង។

ក្រោយពេលកើតហេតុមន្រ្តីសាលាធានីភ្នំពេញ បានចាត់កម្លាំងចុះមកកាត់ដើមឈើយកចេញ ដើម្បីបញ្ចៀសការកក់ស្ទះចរាចរណ៍ផងដែរ ៕ដោយ៖ជ្រោយពេជ្រ