នាយករដ្ឋមន្ត្រីបារាំង លោក Manuel Valls បានថ្លែងប្រាប់ប្រភពប៊ីប៊ីស៊ីកាលពីថ្ងៃទី២២ ខែមករា ឆ្នាំ២០១៦ថា ប្រទេសបារាំងនឹងបន្តចាត់ទុកប្រទេសស្ថិតក្នុងគ្រាអាសន្នជារៀងរហូត ទាល់តែសង្គ្រាមពិភពលោកប្រឆាំងទៅលើក្រុមរដ្ឋអិស្លាម IS ត្រូវបានបញ្ចប់ ។
វិធានការនានាត្រូវបានដាក់ចេញឲ្យអនុវត្តបន្ទាប់ពីក្រុមរដ្ឋអិស្លាមបានវាយប្រហារនៅទីក្រុងប៉ារីសកាលពីថ្ងៃទី១៣ ខែវិច្ឆិកា ឆ្នាំ២០១៥នោះរៀងមក ។ កងកម្លាំងប៉ូលិសបារាំងបានប្រកាសចាត់ទុករដ្ឋស្ថិតនៅក្នុងគ្រាអាសន្នរយៈពេល៣ខែ ហើយការអនុវត្តច្បាប់គ្រាអាសន្ននេះ ប៉ូលិសមានសិទ្ធិនៅក្នុងការចាប់ខ្លួន វាយឆ្មក់ និងការចូលឆែកឆេរលំនៅឋានណាដែលសង្ស័យភ្លាមៗតែម្តង ។
នាយករដ្ឋមន្ត្រីបារាំង លោក Manuel Valls បានព្រមានផងដែរថា វិបត្តិជនភៀសខ្លួននៅសហគមន៍អឺរ៉ុបបានធ្វើឲ្យសហភាពនេះប្រឈមជាមួយការគំរាមកំហែងកម្រិតខ្ពស់ ។ លោកស្រីអធិការបតីអាល្លឺម៉ង់ អេងហ្គេឡា ម៉ាក់កែល មានគម្រោងជួបពិភាក្សាជាមួយនាយករដ្ឋមន្ត្រីទួរគី លោក Ahmet Davutoglu នៅទីក្រុងប៊ែរឡាំង ដើម្បីស្វែងរកការជួយអន្តរាគមន៍ទប់ស្កាត់លំហូរជនភៀសខ្លួនមកពីប្រទេសដែលកើតមានសង្គ្រាមចូលទៅកាន់សហភាពអឺរ៉ុបច្រើនខ្លាំងពេក ។
ក្នុងបទសម្ភាសជាមួយប៊ីប៊ីស៊ីនៅឯទីក្រុង Davos ប្រទេសស្វីស នាយករដ្ឋមន្ត្រីបារាំង Valls បានថ្លែងថា បារាំងកំពុងស្ថិតនៅក្នុងស្ថានភាពមានសង្គ្រាម ហើយកាលៈទេសៈនេះ អ្នកអនុវត្តច្បាប់ទាំងអស់របស់បារាំងចាំបាច់ត្រូវតែការពារពលរដ្ឋរបស់ខ្លួន និងប្រទេសរបស់ខ្លួន ស្របតាមរបបលទ្ធិប្រជាធិបតេយ្យរបស់យើង ។
អ្នកយកព័ត៌មានប៊ីប៊ីស៊ីបានសួរថា តើបារាំងអនុវត្តច្បាប់គ្រាអាសន្នរយៈពេលយូរប៉ុណ្ណាទៀតនោះ, នាយករដ្ឋមន្ត្រីបារាំង លោក Valls បានឆ្លើយតបថា នេះជាពេលវេលាដែលចាំបាច់ ។ យើងមិនអាចប្រកាសឈប់អនុវត្តច្បាប់គ្រាអាសន្ននេះបានទេ ។ លោកបន្តថា ដរាបណាការគំរាមកំហែងនៅតែមាននោះ យើងទាំងអស់គ្នានៅតែអនុវត្តវិធានការការពារជានិច្ច យើងឈប់អនុវត្តច្បាប់គ្រាអាសន្ន ទាល់តែក្រុម Daesh (IS)សាបសូន្យអស់ ។
លោក Valls បានបន្តថា នៅអាហ្វ្រិក នៅមជ្ឈិមបូព៌ា និងនៅតំបន់អាស៊ី យើងត្រូវតែលុបបំបាត់ លុបបំបាត់ក្រុម Daesh ។ សរុបមក នៅទូទាំងពិភពលោក យើងកំពុងប្រឈមមុខជាមួយសង្គ្រាមប្រឆាំងក្រុមភេរវកម្ម ។ សង្គ្រាមដែលយើងកំពុងតែធ្វើនេះ ជាសង្គ្រាមនៅទូទាំងពិភពលោក និងគ្មានក្តីមេត្តា ៕
