ខេត្ដបន្ទាយមានជ័យ៖ នៅវេលាម៉ោង ៥ល្ងាចថ្ងៃទី២០ ខែមករា ឆ្នាំ២០១៦ មាន ករណីគ្រោះថ្នាក់ចរាចរណ៍ដែលបង្កឡើង ដោយម៉ូតូមួយគ្រឿងបានបើកបុករះកង់ សិស្សសាលាដែលត្រៀមនឹងឆ្លងថ្នល់ បណ្ដាលឱ្យអ្នកជិះម៉ូតូរបួសធ្ងន់២នាក់ ចំណែកកូនសិស្សរបួសស្រាល៤នាក់ លើ កំណាត់ផ្លូវជាតិលេខ៥៦ ស្ថិតក្នុងភូមិ គោករកា ឃុំតាបែន ស្រុកស្វាយចេក ខេត្ដបន្ទាយមានជ័យ។
ប្រភពពីមន្ដ្រីនគរបាលបានឱ្យដឹងថា មុនពេលកើតហេតុមានម៉ូតូមួយគ្រឿង ម៉ាកហុងដាឌ្រីមពណ៌ខ្មៅ ស៊េរីឆ្នាំ២០១២ ពាក់ស្លាកលេខបន្ទាយមានជ័យ១G-៩៤ ១៤ បើកពីជើងទៅត្បូងឌុបគ្នា២នាក់ បើក ដោយឈ្មោះ ផៃ គង់ ភេទប្រុស អាយុ ២១ឆ្នាំ មុខរបរលក់សាច់ជ្រូកនៅភូមិ រលួស ឃុំរលួស ស្រុកស្វាយចេក។ លុះ បើកមកដល់ចំណុចកើតហេតុបានរេចង្កូត បើកទៅបុករះទៅលើកង់សិស្សសាលា៣ កង់ដែលកំពុងឈប់នៅចិញ្ចើមថ្នល់បម្រុង ឆ្លងថ្នល់បណ្ដាលឱ្យរបួសឈ្មោះ ផៃ កង់ បែកបបូរមាត់លើ និងបាក់កដៃស្ដាំធ្ងន់ និងឈ្មោះធាន ប៊ុនផៃ ភេទប្រុស អាយុ២១ ឆ្នាំមុខរបរសិស្សរស់នៅភូមិឃុំជាមួយ គ្នារបួសបែកជង្គង់ស្ដាំ និងបាក់ជើងខាង ស្ដាំធ្ងន់។ ចំណែកកូនសិស្សរបួស៤នាក់ ស្រាល ទី១-ឈ្មោះ គ្រី សីម៉ា ភេទស្រី អាយុ១៧ឆ្នាំ សិស្សនៅភូមិអូរវែងជើង ឃុំតាបែន ស្រុកស្វាយចេករបកកែងដៃ ស្រាល, ទី២-ឈ្មោះ តុត ចំរុង ភេទប្រុស អាយុ១៥ឆ្នាំ សិស្សរស់នៅភូមិ-ឃុំ ជា មួយគ្នារបួសរបកជង្គង់ស្ដាំស្រាល, ទី៣-ឈ្មោះ ស្មាន ស្រីមុត ភេទស្រី អាយុ១៥ឆ្នាំ សិស្សរស់នៅភូមិ-ឃុំជាមួយគ្នាររបក ខ្នងដៃឆ្វេងស្រាល និងទី៤-ឈ្មោះ ភឿត សុភា ភេទស្រី អាយុ១៥ឆ្នាំ ជាសិស្ស រស់នៅភូមិ-ឃុំជាមួយគ្នារបួសស្រាល។
ក្រោយកើតហេតុសមត្ថកិច្ចជំនាញ បានចុះដល់កន្លែងកើតហេតុ និងបាន បញ្ជូនអ្នករបួសធ្ងន់ទៅកាន់មន្ទីរពេទ្យ បង្អែកខេត្ដបាត់ដំបង។ រីឯម៉ូតូ និងកង់យក មករក្សាទុកនៅអធិការដ្ឋាននគរបាល ស្រុកស្វាយចេករង់ចាំដោះស្រាយនៅ ពេលក្រោយ៕
ដោយ៖ សហការី
